引言：點解選擇「一人創業」？
如果你睇緊呢篇文章，可能已經有把聲音喺你心入面響起：「我係咪應該開始自己嘅事業？」呢把聲音可能來自對現有工作嘅不滿，渴望更彈性嘅生活方式，又或者係一個埋藏喺心裡好耐嘅創業夢想。
今次我選擇一人創業，最初動機其實好簡單——我想喺湊小朋友嘅同時，保持專業發展。朝九晚六嘅工作模式從來都唔係我杯茶，到咗新環境，根本冇諗過走去打工。雖然之前試過其他創業模式，但要思考問題、做決策、定計劃，仲要將計劃實現，同時要兼顧幾段關係：拍檔、員工、投資者、商業伙伴等，實在需要好大嘅心力！呢一刻要兼顧家庭同埋運作中嘅業務，呢個模式已經唔啱我，但我又唔想放棄多年累積嘅專業技能同人脈。一人創業不單止畀咗我時間上嘅彈性，仲令我可以直接見到自己努力嘅成果，呢種成就感係打工難以比擬。「一人創業」相比傳統創業模式有幾個明顯優勢：成本低（唔使租辦公室、請員工）、決策快（唔使開會討論）、可以更靈活咁試唔同諗法。當你發現方向唔啱時，調整策略嘅成本都相對較低。
第一步：重新審視自己
創業第一步唔係諗點樣搵最多錢，而係認真了解自己。我建議你問自己呢幾個問題：
我有咩專長？
列出你擁有嘅技能、工作經驗、專業知識，同埋你接觸到嘅人脈網絡。好似你可能係設計師，有豐富嘅品牌設計經驗，認識一批中小企老闆。
我有咩興趣？
諗下你平時鍾意做啲乜，會為咗咩嘢捱夜做研究。將興趣變成事業，你會更有熱情堅持落去。無論係攝影、寫作、烹飪，定係數據分析，每樣嘢都可以變成收入來源。
我想解決咩問題？
睇下你身邊有咩痛點，有冇人同你有共同困擾。好多成功嘅創業者都係因為想解決自己面對嘅問題而創業。我有個朋友因為搵唔到啱自己小朋友嘅興趣班，最後自己開咗間專注特殊教育需要兒童嘅教育中心，反應相當好。
我應該如何開始我的創業旅程？
將零碎意念視覺化
我鍾意用 Notion 整個 self-audit 表格，將以上問題嘅答案記低，然後用思維導圖（mind map）將相關嘅點連埋一齊。咁樣通常會有好多新發現。關於 Notion 表格同 Mind Map，稍後會再詳細講解。
如果你未接觸過呢啲工具，我有個簡單又有效嘅方法：攞幾張 A4 白紙同埋顏色 Markers，用唔同顏色將答案寫喺紙上面。顏色越豐富越好！唔使要求完美，只需要將腦海彈出嚟嘅嘢寫低。諗到圖像就畫埋出嚟。如果一次寫唔晒，又或者覺得唔夠滿意，可以過一兩日再寫過。
當你寫多幾張紙之後，你會發現對自己嘅了解愈嚟愈深、愈嚟愈清晰，甚至會有種豁然開朗嘅感覺！呢個視覺化（Visualize）嘅過程好重要，等我哋可以一眼睇晒成個構思。咁樣除咗可以發現自己諗漏嘅嘢同盲點，仲可能激發到新諗法。最重要係，視覺化之後會更加容易同人講解你嘅構思，等我哋更好準備去行下一步。
即將推出 🔥「一人創業」Mind Map 製作體驗工作坊 🔥 按此查看詳情🔎
創業大計視覺化示意圖
即將推出 🔥「一人創業」Mind Map 製作體驗工作坊 🔥 按此查看詳情🔎
找到初步方向：MVP思維出擊
等到「完美創業點子」嘅人，通常都係等到放棄為止。與其企喺度諗，不如用 MVP（Minimum Viable Product 最簡可行產品）思維出擊——做個簡單版本，試吓市場反應。
例子：有位朋友製作咗一啲自己設計嘅記事簿放喺 Amazon 度賣，賣出咗第一本之後，就陸續將佢嘅其他設計諗法變成產品放喺 Amazon 度。過咗一年多，而家已經出版咗29款書籍，共售出300幾本，銷售遍及10個國家。
而家大家睇緊呢篇文章（同埋成個 blog）就係最好嘅 MVP 例子！我將一人創業嘅想法逐步寫低，公開分享晒我嘅做法，等志同道合嘅朋友可以參考。喺文章入面，我會分享創業嘅「慘痛」經驗、介紹實用工具同使用心得，仲會分享我對市場趨勢同人生嘅睇法。今次我設計咗個 Notion template，喺 blog 文章同社交平台度俾人免費 download，等我可以收集大家嘅反應。下一步就係推出收費工具同埋一個整 Mind Map 嘅 Workshop。如果有人 download、購買或者報名，就證明市場真係有需求，我就可以根據 feedback 設計下一個產品。呢啲 MVP 測試唔單止可以驗證創業者嘅諗法，仲可以解開心中疑慮，增強信心。
你嘅第一個嘗試唔使完美，只需要足夠好到可以測試你嘅假設：「有人願意為呢個產品/服務俾錢嗎？」關於 MVP 設計及案例，稍後會有更詳盡嘅分享。
開始實驗：用最低成本試錯
創業初期，盡量控制成本。好多工具都有免費版可以用：
- Notion或Google Sites建立簡單網站
- Canva設計基本宣傳素材
- Instagram同WhatsApp Group接觸初期客戶
- Google Forms收集客戶意見同訂單
我最初就係用facebook分享自己嘅產品同創業心得，慢慢建立咗一批追蹤者。你唔使等一切準備好先開始，邊做邊學，記錄低過程，反而更能吸引同路人。
真實例子：良茶坊由一間傳統涼茶鋪轉型成為網店，產品由苦茶變成而家嘅花草茶以及湯包，初期都只係得一個facebook page，再加一張google form畀人落單，完全零成本，直至產品定位確定，生意漸多先開始整網站租地方加人手；經過多次演變，而家售賣產品種類係初期嘅20倍，變成24小時運作，客戶遍佈全球。
建立支持圈：唔好一個人行
「一人創業」唔代表你要孤軍作戰。搵啱支持圈子好重要：
- 加入創業社群，了解同路人面對嘅挑戰
- 參與行業聚會，擴闊人脈
- 搵accountability partner，互相督促進度
我發現創業路上最大嘅動力來源唔係賺咗幾多錢，而係有一班同路人一齊成長。大家分享經驗、交流心得，互相扶持，令創業之路變得更有趣同更有意義。
如果你都想搵到呢種支持，歡迎加入我嘅【創業毅行 x 玩出商機】社群，呢度聚集咗一班一人創業或者計劃創業嘅朋友，大家每星期都會分享進度同疑難。
一人創業起動四步曲
結語：開始行第一步，先會見到第二步
我見過太多人停留喺「計劃中」嘅階段——等多啲資金、等多啲時間、等多啲準備。但創業從來都冇「perfect moment」，只有你行出第一步，先至會見到第二步係點。
記得我剛開始嗰陣，都試過質疑自己嘅決定，擔心收入唔穩定，驚自己唔夠專業⋯⋯但當你真正開始，踏出第一步，好多假想嘅障礙都會變得冇咁可怕。
所以，無論你嘅創業點子係咩，今日就做一個小行動，例如寫低你嘅專長清單，或者同朋友傾下你嘅構思。一步一步，你會發現自己行得比想像中遠。
你準備好未？第一步，由而家開始。
—
我係 Kevin，連續創業者，呢個係我嘅「一人創業」系列。每日我會分享我嘅創業心得同埋挑戰，希望可以同大家一齊成長。
