《閣再補一撇—無閣聯絡》
伊買一个健康檢查的會員，有２張卡，１張欲送我，我講你予恁厝內面的人。聽伊講欲送予一个同事，我講按呢予我。
伊去做檢查了，一直催我去做，我拖到３月初去做。照出我的肺部有結節，醫生講會使先做切片，看是良性抑是惡性？嘛會使直接切掉，切掉了後，會去做檢驗，就知影是不是惡性？我想講切片代誌較細條，希望是良性，無代誌。
等檢查的病房等誠幾工，因為是內科，優先排咧誠後面。有一工拜六，接到通知去蹛院。我入去了後才知影，拜六、禮拜啥物代誌攏無做，干焦是占病房爾爾。彼工伊佇台北，約朋友見面。我家己先去病院，佇厝內留紙條仔，等伊轉來了後，才去病院揣我。
彼２工，伊陪我佇病院，感覺伊誠歡喜，捌講過，伊希望我破病，伊才會使照顧我—這个講法怪怪，嘛誠恐怖。這２擺伊來台北，愈來愈超過，欲睏進前會共我抱一下；拄著面的時共我唚一下；猶閣講紲落來欲同齊去佗位𨑨迌的計劃……。我佮伊講話仝款愛講幾若遍伊才聽有……。伊來陪我蹛院我真多謝，毋過……
伊轉去了後，我共我的感覺窮窮（khîng—整理）一下，足忝耶！想到我是按怎共分手期拖甲誠長？２年外，予家己咧無爽快的情形遐爾仔久。分手了後，閣延宕７个月，伊明顯無明白我想欲陪伊家己生活的好意，我的建議嘛無做，按呢一直咧了我的能量。下一段感情袂使閣按呢，愛較緊煞場—毋是，毋是下一段，這馬就愛行動。
我line予伊，簡單寫幾項我足忝矣！咱袂閣聯絡，共line封鎖。伊轉用面冊訊息問我，問我會共伊講切片檢查的結果無？我講會，落尾想想一下，回伊：「你不需要知道。」共２个面冊攏解除朋友。
《癌》
切片的結果是肺腺癌，第１期，佮進前我知影得到糖尿病時的想法仝款，我過甲誠健康，哪會按呢? 毋過我無加想，這馬的醫術遐進步，這是醫生的代誌。我愛想的是，癌是細胞一直生一直生，無底止（bô-tí-tsí—無止境），停袂落來，越頭看我家己，啥物物仔傷濟矣！一直增加，擋袂落來，我想到的是，替人設想傷濟，傷好心，做傷濟這方面，癌的部份會使切擲掉，但是重點是未來會復發無？我是身心靈諮詢師，阮這家用的方法是，看生活四箍圍仔的訊息來修正家己的缺失，病是咱的朋友，伊咧共咱講啥物傷濟，啥物傷少，佗位需要改變？若是啥物攏無改變，病會復發，會閣病一擺。
閣再做一寡仔手術進前的檢查，猶有復健，先共筋肉佮心肺的功能練較好一屑仔，手術了後的恢復會較緊一點仔；共我的工課暫停，抑是分予別人，嘛無心情做代誌矣！生活調整閣較健康一寡仔；共「預立醫療自主計劃」詳細看幾若遍，簽「預立安寧緩和醫療暨維生醫療抉擇意願書」，共囡仔講清楚我生命上尾仔欲按怎選擇（這可能20年後才會用著，手冊頂懸講年滿20歲就愛規劃囉！手術中間嘛可能會失手），我無想著思考生命上尾一步的階段遐爾仔緊就來到面頭前。
準講明仔載會死去，我嘛無遺憾，我攏有好好仔過每一工；只要我活咧，體力恢復（抑是心情變好）了後，我猶是愛繼續想我的愛情、我的情慾，我對我家已傷歹，無好的代誌忍受遐長的時間，想欲愛的延遲追求，唉！（全文完）
（華文寫於2018年;台文翻譯完2026.4.4.）
教育部台語辭典，https://sutian.moe.edu.tw/zh-hant/
