目睭看著的，無的確是真的（台文）
●我細漢的時陣，有一工阮媽媽無佇厝，佮老爸、小弟食飯食煞，小弟目睭看我，手指桌頂講：「你愛收，你去收收一下。」
我感覺足奇怪耶！平時，媽媽講伊的身體無好，愛我鬥做厝內面的工課，食飽了後，我隨時去洗碗，遮叫做「我愛做」？
●進前我看過一篇文章，伊佇講伊的未婚妻，其中有一項是：「伊愛使用鋼琴，贏過用洗衫機。」（原來的華文敢若是：比起洗衣機，她更喜歡使用鋼琴）
我心內佇想，真好啊！結婚了後，洗衫機就予你家己用，抑是蹛老母的厝內，洗衫機猶原老母、姊妹仔繼續用。
伊看伊的老母，抑是姊妹仔，逐工用洗衫機洗逐家的衫，伊準講，in兜的查某人攏真愛用洗衫機。
●以前，我佇報紙看著一篇文章，伊講伊拄拄結婚的時陣，有一擺佇煮菜的時，看著果子籃仔內面，有一粒木瓜誠熟，強欲爛去矣！伊原本討厭食木瓜，毋過伊認為伊有彼个責任共食掉，就共削削，食完。
伊的大家看著，掠準伊愛食木瓜，逐擺買菜的時，就買木瓜轉來予伊食，予伊誠艱苦。
●進前有一擺，阮兜搬厝了後，有一個原本厝邊仔的媽媽來我兜𨑨迌，阮老母炒麵請伊。
尾仔閣來一擺，老母猶原炒麵。伊轉去了後，老母共我講：「頂改我炒麵請伊，伊有食。」意思是伊有食，表示伊愛食麵。
阿母啊！你請人食麵，伊若無食，是欲食啥？人愛食啥物，毋用問耶，隨在你臆。
●較早的時代，大部份的人厝內生活較艱苦，無快活，食飯的時，做老母的人攏挾肉骨仔、魚頭去食，囡仔看著，想講老母愛食骨頭。
有一個做媽媽的人寫，伊破病蹛院的時，伊的後生佮新婦按厝內紮來的便當，內底攏是魚頭、魚骨仔，伊看按呢感覺足心酸。
（2023.11.23.）
留言0
查看全部
