凌晨兩點，我仲喺度對住電腦改文案，冇 deadline，冇老細催，但心入面唔係輕鬆，反而係種不安。
係，聽朝仲要晨早趷起身煮飯畀阿仔，好想快啲瞓！但係如果唔搞掂埋篇稿，諗掂個 campaign，推爆佢，下個禮拜冇數就大鑊！
創業以為係好型好自由，點知好多時候只係獨對 MacBook 嘅風扇聲。一人創業，真係等於自由？定係孤獨？
💡 一人創業嘅「自由」好迷人：
- 想幾點開工就幾點開工 & 鍾意幾點收工就收工 😜
- 接咩客、做咩 project 自己話事 Yes!! 💪
- 唔使再開無聊會議、唔使「做大龍鳳」、冇公司 Politics
- 唔使做埋晒啲無謂報告、唔使再對住嗰位「腦細」
- 學習進度、成長路線，自由發展由我話事 Yeah!! ✌️
但好快你會發現——自由嘅背後，其實係決策疲勞、自我懷疑、無限責任、情緒過山車同埋有形無形嘅壓力。
😶🌫️ 「自由」另一面，係孤獨
- 好多 idea 無人 validate，只能自己兜圈諗清楚
- 每次 launch 新 product，成功無人拍手，失敗無人慰問
- 咩都自己做、自己頂、有問題都唔知問邊個
創業，係由你話事，但唔代表你唔需要連結其他人。
最痛唔係做得辛苦，而係行咗好耐，都好似無人知你做緊乜嘢，無人明白你嘅感受。
🔧 點樣令孤獨變成力量？
1. 搵同行者 (Tribe)，唔一定要搵拍檔 (Partner / Co-founder)
你唔一定要搵拍檔，但一定要搵到一班同行者，可以傾偈、交流、互撐。我哋唔需要日日見面嘅同事，但需要明白你處境嘅同路人。
創業社群、mastermind 小組、行業 Telegram 群組，呢啲都係打破孤獨感嘅好地方。有時一個簡單嘅「你點呀？」已經可以紓緩好多壓力。
2. 寫創業日誌，唔係為分享，而係為記得
記低每一個小 milestone，將進步「視覺化」，打破迷惘感。創業路上嘅小勝利，好容易畀新挑戰掩蓋。
每日、每週記低你做咗啲乜、克服咗啲咩困難，當你陷入「好似行咗好耐都冇進展」嘅感覺時，翻閱日誌就會發現：原來你已經行咗好遠。
話唔定，你會喺日誌入面發現到啲意想不到嘅靈感，「叮」一聲令你柳暗花明。
3. 建立自己嘅微型社群或內容平台
由你開始講故事，自然吸引理念相近嘅人，將孤獨變連結。
可能係一個 newsletter、一個 podcast，甚至係一個 WhatsApp group，重點唔係規模，而係真誠。當你分享自己嘅旅程，自然會吸引同路人，形成互相支持嘅網絡。
如何將孤獨轉化為力量？
🧭 自由與孤獨，唔係對立，而係創業者必經嘅兩面
選擇一人創業，唔代表抗拒團隊，而係選擇先成為自己最強嘅隊友。
自由同孤獨，就好似一個硬幣嘅兩面。有自主權嘅時候，就會面對更多不確定性；有獨立思考空間嘅時候，就少咗即時反饋。
但正正係呢種張力，成就咗最真實嘅成長。
呢個世界充滿咗「快速增長」、「團隊擴張」嘅成功故事，但一人創業嘅價值，往往唔係喺規模，而係喺深度同可持續性。有時慢慢嚟，反而會快咗。
一人創業，就好似一場長途山賽：天氣變幻莫測，路途高低起伏，但正正係呢啲磨鍊，最終塑造到一個更強大嘅生命版本。
Be a better version of yourself.
如果你都經歷緊呢條路，留言話我知：
你覺得，一人創業，自由多啲，定孤獨多啲？
—
我係 Kevin，一人創業者，呢個係我嘅「創業毅行」系列第一篇。每日我會分享我嘅創業心得同埋挑戰，希望可以同大家一齊成長。
