3 冬前款這碗湯，翁 ê 態度佮恁老母掠著牛肉麵內底有薟隨做出「我誠知機你想 bueh 毒 gún 翁」ê 表情，3 冬後因為我 ê 痟貪險 bueh 軁雞籠進前想著 Blog 有記錄一篇番仔薑湯隨搜出來消化彼袋 3 公斤 1.99€ ê 番薑仔。遮 ê 番薑仔金常一袋 500g/1.59€(特價)，烏露戰爭拄開始捌起甲紅色規包 2.29€，三色番薑仔 3.49€。
3 冬後湯款好我無特別交代主要食材是啥物 hōo 翁家己去愖我葫蘆內底賣啥物藥，起因我 tuì 彼个表情佮態度到今猶是彼陣 ê 反白睚 buē 跟綴伊 ê 話踅金龜磨。
「甜番薑仔湯好食」翁食一喙隨笑微微 kā 我褒唆。我清楚知影這是商詳後必捧 ê 客氣話「你若無佮意 ē-tàng 家己攢糜飯」我那食家己 ê 額那應。
「這正經好食甲 hōo 我想 bueh 閣來一碗」
「Gún 翁無食薟」、「你呔 bueh 煮這」我照彼久 ê 聲音佮態度熥戲齣 hōo 伊看。
「彼个問題真正是我惹出來，失禮」
遮 tsuē 冬過去，總算等著這句失禮伊 mā 總算理解家己閣繼續按呢老母囝，未來無人繼續 uī 伊攢腥臊閣豐沛 ê 糜飯。
Tsa̋ng 收著水道錢，伊隨問是這三月日咱有兩月日無踮厝是按怎水道錢 ē 遮爾仔貴。
聽伊按呢問我知影伊 ê 爸母又閣上童簡單應一句「我 m̄ 知影，我照咱 ê 需求整理厝內佮款糜飯」隨離開現場，伊 mā 隨發覺家己又閣暗頭仔食西瓜，反症，隨會失禮，總是我需要時間來整理這个咸豐三，講到今 ê 問題，起因我提出 ê 解決方式伊攏 m̄ 答案。
今仔日(10.10)透早臨時臨曜想起這碗湯 mā 想著伊老母上身 ê 畫面 hōo 我閣較確定愛來煮這碗湯試驗伊 ê 態度，因為一透早起床伊隨傱來廚房講「Tsa̋ng 我真正無彼个啥物問攏是你 m̄ 著 ê 意思。」
我家己 mā 足相踏黜，氣身惱命猶閣佮伊大麵炒圓仔，膏膏纏。不過，我清楚知影遮 ê 氣身惱命是伊自囡仔時就慣勢 ê 教育，所以伊 buē 感覺伊這款態度有佗落 m̄ 著勢，清楚知影伊 ê 病症就愛佮有耐性 kā 拆藥煎藥，像這久按呢伊 ē 曉主動會失禮並承認家己 ê m̄ 著。
我家己 mā 相𫝛，我按伊 ê 問題揣著按怎 hōo 番薑仔湯煮甲敆伊 ê 喙斗，彼就是加囥幾粒塗肉林檎，按呢就 ē 成做伊愛 ê 喙斗 --- 羮湯款。
𪜶老母 ê 你 bueh 毒 gún 翁 ê 牛肉麵事件，本底想 bueh 寫出來，字那敲，彼个問題 mā 翻厝 ê 紅磚仝款，一塊一塊敲落塗擲去回收場，無要意。
翁聽我講這月日 ê ' 300 ' 已經夠額甲相片囥無所在隨「你敢 bueh bué 空間？」
「無想，無人來看我 ê Blog」我講。
「當然 mā 是有人，我就是人。」
聽伊遮爾仔頂真 ê 回答，我笑甲歪腰 mā 翻頭愖無 bueh 開錢 bué 空間佮是按怎想 bueh 開始寫 Blog ê 因由。
「我猶未揣著寫 Blog ê 因由，所以暫時無這个拍算」我愖一睏仔後講。
「一冬 599 台票 hōo 你 buē 縛跤縛手，這條錢 m̄ 免儉」翁講。
一个結拍二十四个結 ê 翁一搪著網路世界隨冇手 hōo 我喙 mā 隨癢，不過一想著 gún-ê 財務是一角做兩半，五分五分，厝內物一人一半，個人經濟獨立，這久 ê 伊是 bueh 疼某，我隨家己扒癢「我知影一冬 599 連 bué 半尾三文魚攏無夠額，不過我向望咱撏出去 ê 錢 ē 生湠 m̄ 是 kan-ta 媠幾日仔就蔫甲無藥醫治。」
「你 bueh 倚靠 Blog 趁錢？」翁若牛目 ê 目褫甲若月娘遐爾仔大掠我金金相。
「我 bueh 做網衝就 buē tī 遮佮你喋詳」我 mā 若西班牙鬥牛 hőng 弄甲隨伊去，按鼻仔吐一氣大氣。
「我知。」
你知就 buē 講遮 ê 譀古，我 kā bueh 濺出來 ê 話一字一字閣吞落嚨喉， 畢竟我家己 mā 無佮意別人捷攑日本剾刀倒剾我 ê 慣勢 --- 厚話屎。
「一冬 599 ê 議題就交 hōo 時間來決定」我講。
Buē 記得我 tī 底時 bué 空間，總是 ē 記得第一篇文章是2019 tī Regensburg ê 飯店那聽王秀蓉老師 ê《我咧唱歌》那試寫台語文《海明威 ê 中晝》。
就按呢我 ê Blog 就按華文符號轉做以台語文符號做四常記錄，而且愈寫愈煞心愈寫愈有一陣幸福 ê 鹿仔 tī 心肝穎跳過來跳過去，像周盈成先生 tī《做伙走台步》「用台語寫世界，伊想的佮你無仝」。
我 mā 猶 ē 記得彼日 ê 雨來天翁䖙眠床認真佮巧機仔相黏蒂帶，我坐 tī 紅色 ê 膨椅那看雨霎仔輕輕降落 tī Regensburger Dom 閣輕甲 hōo 人攏見 buē 著跤跡 ê 辭別，秀蓉老師 ê 聲音引𤆬我踅轉去故鄉 ê 天佮地恬靜享受我 mā 咧唱歌 tī Pixnet 唱我家己 ê 驢仔歌。
寫著湯想著「台語聽有無：喝相關台語按怎講」何信翰老師談著食湯抑是啉湯 hōo 我想著德語 mā 是講食湯(essen)啉咖啡(Trinken) m̄ 是食咖啡啉湯。
2023.02.10
