歐洲 ê 意大利、葡萄牙、法國、西班牙齊有種米，遮 ê 國家所栽種 ê 米交咱番薯島台灣無相𫝛，總是猶是揣有交脾土相敆 ê 米種，特別是意大利佮葡萄牙。我 tuì 意大利食食文化無研究，總是我印象中有地選擇 ê 意大利米種交咱番薯島相𫝛 tsuē 甲若河溪，價數閣親切可愛。
德國這幾冬食米人口增加，總是𪜶 ê 市場以我個人 ê 觀察猶原保持印度米交泰國米兩類，這个綿豉 ê 固定 m̄ 知是市場做決定抑是進口商做決定。所致準做糙米有我需求 ê 鋅，我 mā 罕得 bué，畢竟印度米交泰國米正港無敆我喙就莫杜猴損五穀，我 mā 貧惰 uī-tio̍h 一包敆家己喙斗 ê 米專工盤兩到三幫車到市區 ê 中國超市款米轉來補喙空。所致生活無法度照家己 ê 四序來行，家己就愛揣四序，像目前生活 tī 愛食肉無愛食海產 ê 德國，罕得食鋅夠額 ê 牛肉就換食雞心豆、燕麥片、優格、腰果、蘑菇、菠薐仔、䆀豆等等來補家己喙白交避免褲袋仔袋磅子帶來 ê 困擾。
囡仔時讀天增歲月人增壽，春滿乾坤福滿門認為伊是自然，這久讀這對聯是自我安慰劑。無 tsiâu-tsn̂g ê 營養交規律 ê 生活慣勢向望家己有機會跟綴天添歲數，我較早睏較有眠。我 tuì 北非小米一直有興趣，總是一想著伊愛炊我就𤺪。炊這个動作 tuì 我來講就是厚工 ê 代表辭。像炊粿愛浸秫米、挨米、菜頭礤簽、抐米漿...一想著遮 ê 工課我隨放棄，準做逐家齊講好味素。
近來款秮仔見著北非小米，Heidi 分張 ê 北非小米步頻出現 tī 腦海 hōo 我想著伊 ê 好味素，開始認真繩伊 ê 料理手路。總是華文從來 m̄ 捌認真繩，非專文科 ê 德文愈 m̄ 講 ê 以煮米手路鬥「北非小米翕十分鐘」出來 ê 北非小米恐怖甲若 Hermann Hess tī Demian 抑是 Peter Camenzind 是佗一本，我已經無一个印象，總是彼段形容德國太太 kā 米煮甲若 Brei 𫝛款 ê 畫面到今猶原放 buē 記，起因我 ê 北非小米 mā 生做伊剾洗 ê 生張，伊猶原 ē 食得，總是你清楚知影眼前 ê 北非小米 m̄ 是這款面肉。
北非小米無比米貴，總是驚 hōo 雷公摃交虛華 ê 喙脣一粒珠，講話 m̄ 認輸，剾洗別人 buē 曉駛船嫌溪狹家己 mā 愛有兩步七，隨上網請教眾大神賜我智慧。
傳統籠床 ê 手法跳過，燃一鈷滾水倒入北非小米抐 hōo 無半滴水，翕 10 ~ 15 分鐘，這个手路適合我貧惰性隨有樣趁樣綴 leh 做，押尾猶原失敗 hōo 我決心挽瓜揫藤 m̄ 通繼續未曾學行先學飛，未曾掖種想挽瓜。
開始思考，屬 Hartweizen 𠕇質小麥仔 ê 北非小米呔討有才調 kā 浸水透暝這步手路省落來 hōo 伊隨炊隨食？隨上網路請教眾神賜我智慧生。
按呢閣按呢，彼號閣彼號...原來如貓，北非小米是 kā 𠕇質小麥仔磨甲幼幼透濫麵粉篩做若秮仔 ê 麥仔米，這个手路 tī 7 世紀就開始，伊適合欠水 ê 沙漠煮食，伊 tī 歐洲開始時行是按 19 世紀 ê 法國開始。
跟綴網路眾神行一逝北非小米 ê 前世佮今生第三斗 ê 北非小米總算大成功，我總算抐出網路相片 ê 北非小米，黃金仔黃金閣粒粒分明若咱 ê 蓬萊米。
北非小米 hōo 人上深 ê 印象是肉做押底，小米做頭陣，像中部粽，無斟酌看你 ē 掠伊做這句俗諺語，三下咬，無見餡 ê 若鹼粽白汫無味。鹼粽白汫無味是我個人感覺，無表示伊真正白汫無味。
北非小米 ê 食法有百百款，我 ê 版本是順德國包裝 ê 建議「北非小米適合做生菜盤」來出菜，北非小米做生菜盤正港比印度米抑是泰國米做生菜盤閣較好味素。因為伊 ê 好味素 hōo 我決心後日去 DM bueh 款一直膽膽 m̄ 敢試鹹汫 ê 土呂其 Bulgur 正港 ê 𠕇質小麥仔，我 ê 14 是無掠外透濫麥粉篩做若秮仔 m̄-koh 𫝛款是燒水透落去抐甲水齊焦，翕 10 ~ 15 分鐘就會使得敆肉、敆生菜來享受 ê 麥仔飯。
人生總是不斷翻頭愖彼久呔討無按呢做抑是彼久早知就莫按呢做，行踏歐洲遮 tsuē 冬從來 m̄ 捌 kā 北非小米囥在眼內 ê 我 buē 翻頭情緒叨撚講「你看你就是遮爾仔愛縛跤帛 m̄-tsiah hōo 家己出外露營 ê 食食，食甲遐爾仔白汫無素」，抑是「呔討無較早想著伊，明明就認捌這味素 mā 意愛甲 buē khiau-khi。」
人生 tshan-tshiūnn 一齣戲，你永遠 m̄ 知影你 ē 交啥物人做陣相拄搪，準做相拄搪 mā 宛然電影《向左走，向右走》徛仝一位卻從來 m̄ 捌相見面 ê 花缽仔種菜，無緣。所致，凡事有伊 ê 緣份，我交北非小米 ê 鉛粉 tī 斡倒爿，斡正爿 ê 十外冬，總算掖到位。
我愛沙漠黃金米、露營好鬥手 ê 北非小米。
