今仔日是板膋收冬第三冬，翻頭看起手食食記錄到目今，阿貓閣倚來問「這斗 ê 定著是食歲抑是擘腹家己 ê 人生 ē 過甲拖帆無品質 m̄-tsiah 趁緊行無好步 ê 智慧？」
「這是其中一个因端，畢竟人生 tshan-tshiūnn 大舞台，苦齣笑料攏公開，做過 ê 戇代誌 m̄ 放手閣綿豉挲跤撚手，無適合我，畢竟我是一个討厭觸纏 ê 人。」
阿貓見無閒仔話通喋斡頭隨走，我 mā 無興熥過了代，畢竟《霍爾移動的城堡》蘇菲阿婆分張過一段話「假使這件代誌 hōo 你食到七八十歲想著伊猶原心狂火著，按呢就莫廕火 hōo 伊著。假使 buē 就放伊自由，m̄ 免交伊大麵炒圓仔，膏膏纏齪死家己。」人生第一斗減肥是參考二姊 bué ê 減肥冊，作者是溫小萍，冊名是《減肥.享瘦》。這本冊按現時 ê 標準來看，伊 m̄ 是減肥冊，伊是一本紀實短文，記錄作者交其他受訪者面對體重壓力交𪜶按怎處理「減肥」壓力。所致無需要減肥 ê 人讀這本冊 buē 有特別 ê 感受，需要減肥 ê 人讀著這本合該然交 gún 二姊相𫝛，認為伊是𤆬路冊。
烏貓姊 uī-tio̍h 別人 ê 喙所行 ê 減肥戇路是路蕎蔥，不成蒜無彼个價值紲講落去，總是無這本《減肥.享瘦》我 ê 減肥初體驗是一人一心，無錢通 bué 針 ê 無才調起鼓。起因我 tuì 腹肚做藥櫥無興趣 m̄ tuì 減肥二字捎無一个寮仔門。
第一斗交伊相拄搪，猶未交男朋友 mā 無人嫌我大箍，冊一讀煞鼓隨 hâinn hōo gún 二姊。上北讀書交著男朋友，因為自信無夠額 hōo 伊吩咐 bueh 落柴嫌東嫌西，一歇寒轉來臺中隨 kā 二姊借冊請教眾前輩𪜶按怎糋板膋。
一篇一篇巡，一篇一篇繩，押尾選擇這位前輩 ê 方式，一日食一頓敆食瀉藥，三月日瘦 15 公斤，數字誠媠 m̄-koh 我 ê 體格比較早閣較䆀，套句現今流行 ê 形容就是林檎體格，四肢瘦卑巴，腹肚若水櫃。這美麗 ê 15 公斤 tī 恢復四常食食 ê 半冬後，伊 m̄-nā 踅翻頭相借問閣紮等路來分張，我按蘋果成做麵龜。這麵龜按德國醫生 ê 講法就是 Bauchfett，我 ê 紅豆餡 tsiah 一屑屑仔，麵皮卻厚甲若壁堵。
這斗 ê 變化有頂擺 ê 經驗交我 mā 清楚認捌這位男朋友是 m̄ 驚火燒厝，驚跋落屎礐 ê 甕肚顧家己性地，我 m̄ 免 uī-tio̍h 這款人 ê 吩咐舞死家己，我就跟綴彼陣 ê 興趣跳 ok-sìn-gù 有氧運動交食食恢復正常，這个 tī 錢項增加是迷人，tī 體重增加是驚死人 ê 代誌，沓沓仔行向上四常 ê 我。
這段期間我 mā 捌跟綴網路時行挑戰一日食 800 kha-lòo-lì 看磅仔 ê 數字敢有法度行向我心所向望 ê 數字交腹肚有馬甲線，像鄭多燕按呢，押尾發見彼是食飽換枵，舞死家己。體重確實有較減，m̄-koh 走無去 ê 林檎體格又閣翻頭來相揣，閣紮一个好朋友來停跤。彼陣 ê 我腹肚三不五時 teh 搐疼，請教醫生醫生講腹內大丈夫 hōo 我掠做家己致著啥物猶未成欉 ê 怪病，二十外冬後 ê 巴爾幹露營車日子，這个龜怪 ê 腹肚疼又閣來相揣，我 tsiah 斟酌注意這个 hōo 醫生檢查講大丈夫 ê 問題。
只要飯頓無照時間來食抑是飯額無夠額，伊隨來相揣。彼陣 ê 我 mā 沓沓仔發見 tī 歐洲這个比臺灣閣較寒 ê 角勢一日食 1400 kha-lòo-lì 實在是無夠額，就沓沓仔增加到 1600 ~ 1700 kha-lòo-lì，經過一冬實驗，我 ê 體重 m̄ 捌行向我心所向望 ê 數字，m̄-koh mā m̄ 捌翻頭行向有伸勼 ê XL。紲落來按 ió-gà 增加一段時間 m̄ 捌做 ê 有氧運動(iú-ióng ūn-tōng)，2024 行踏瑞典挪威發見一日食 1600 ~ 1700 猶是無夠額，開始增加到 2000 kha-lòo-lì 伴 tī 車頂有法度做 ê ABS 運動，今仔日是減冥收冬 ê 第三冬，彼領不只十冬前無伸勼 ê 牛仔褲到今猶原合合 m̄ 捌囊 buē 落去，而且閣掛一領衛生褲。
今仔日是減肥收冬第三冬，自頂冬磅仔看我 buē 慼，我看伊煞愈看愈慼 uī-tio̍h 解決這个問題，自瑞典挪威車日子轉來 uī-tio̍h 理解 ABS 趕有效應徛去磅仔看數字就 m̄ 捌閣交磅仔相借問過，起因莫看較 buē 傷心斷腦筋交 tuì 家己點磺火。
今仔日是減肥收冬第三冬，彼領不只十冬無伸勼 ê 牛仔褲交 tī 韓國 bué ê 外套猶原閬閬有空間，我接受肌肉重量比磅仔數字閣較重要。
第三冬，成功！YA！
2025.03.09
