台文開講 || 我ê塔羅人生

　　平常時除了做台語ê Line貼圖kap寫台語文以外，我khah主要ê工課應該是讀牌仔ê「工人」，佇一寡活動ê市仔排擔，無收錢替人解決一寡in心內ê憂愁，你問我按呢所費按佗來？其實若是你支持我ê想法，願意幫助koh khah濟人來予我服務，會當透過網路來贊助，無論按怎，佇讀牌仔這个工課頂懸，我是無咧收錢ê。

　　頂回我去參加高雄好過日主辦ê市仔，因為按呢熟似tio̍h基進黨（這má改名號做台灣基進矣）內底ê工作人員，in 邀請我去參加陳奕齊ê節目「頭家你好」。原底我koh有淡薄仔躊躇，無確定家己ê工作經驗會當分享到30分鐘遐爾久，尾仔是in ê 工作人員誠認真開真濟時間kap我開講，koh寫一份訪問ê概要kap題目予我參考，才會當順利完成節目ê放送。

　　因為機會難得，我想講應當會當用全台語接受訪問，就kā遮ê問題用台文寫一个答覆，節目佇4/30ê時陣已經順序放送了矣，m̄過m̄是所有ê問題攏有回答tio̍h，我想，就提來遮kap逐家人分享，希望逐家對「塔羅」有新ê認捌，mā希望會當揣著支持我ê理念ê人來贊助我這个讀牌仔ê工課；若是對節目內容有興趣，會當看這个Link。

Q1. 先kā觀眾朋友介紹家己ê名姓跟fanpage名稱ê由來
　　逐家好，我是吳蕙菁，身軀邊ê朋友攏用華語叫我「黑子」，是一个讀牌仔ê”工人”，有ê人會叫我「塔羅師」(華語)，我有一个fanpage叫做荒蕪日晝。
　　會號這个名是因為逐家攏叫我黑子，這个名會去想tio̍h日頭（因為「太陽黑子」），才會想講愛號一个佮日頭有關係ê名，mā希望這个名是用華語佮台語攏會使叫ê出來ê，就感覺日晝這兩字誠適合，而且我希望每一个來揣我讀牌仔ê人攏會用得佇讀牌仔了後感覺tio̍h有光照入去你ê心內，予你ê生活會當順序平安。

Q2. 所以你其實是一位塔羅師，敢會使先kap我們介紹一下啥物是塔羅牌？
　　塔羅其實有幾个系統，m̄過khah基本ê概念就是有固定數量kap意義ê牌仔，咱若是有啥問題，會當透過抽牌仔、讀牌仔予咱ê信息來知影一寡代誌，有ê人會用sign（星座）ê運來幫助解說閣較詳細，但是我家己是kan-na倚靠牌仔予我ê資訊來幫人客讀牌仔，精差咧我除了塔羅牌閣有其他ê牌仔會佇無仝款ê狀況予人客來抽。

Q3. 你是按怎想beh學這？
　　我會想欲學，其實是因為khah早家己有一寡問題歹勢去kā人問，就想講若家己學會曉，就m̄免歹勢矣！想欲按怎問就按怎問。但是自我開始學，到這má會當替人讀牌仔，我其實有一个足深ê體會是，若準講你無法度靜落來思考你ê問題是啥，若按呢你抽牌仔嘛無一定有清楚ê答案，是講若是會當靜落來ê時，差不多就無需要抽牌矣，所致我尾仔這一年是足罕咧替家己抽，嘛是一个誠趣味ê結果。

Q4. 成做塔羅師ê條件是啥?
　　原底我想beh應講無，因為塔羅發展誠久矣，佇台灣mā有誠濟厲害ê老師寫in是按怎學塔羅ê冊，只要你買會tio̍h你佮意ê牌仔、願意開時間去練習，基本上攏學會曉，m̄過若是想beh替人讀牌仔，我有幾个想法予逐家參考：第一就是，你家己愛揣tio̍h一種方式，會當予家己平靜落來，因為心情亂操操ê時陣讀牌仔mā會亂，koh來就是，m̄通共塔羅想做傷過恐怖ê物件、mài用塔羅去嚇驚人，在我家己ê理解（無啥證據，真正是我家己個人ê想法，無一定每一个學塔羅ê人攏是按呢想），我認為人ê無意識有一个部分是佇仝一个所在ê，塔羅只是一種替你kā無意識提出來ê工具；因為是你ê無意識，所以伊知影一件代誌發生了後你會按怎反應，就會知影後壁發生啥代誌，就是因為按呢，有當時仔我會kā人客講，若抽著䆀ê結果mā m̄通傷緊張，這m̄是無法度改，只是講會誠困難，因為這个結果是你ê個性會去行ê路，若beh改，就愛完全kā個性反過來，但是咱攏知影無遐簡單，逐家定定講牛牽去北京mā是牛，所以若真正抽tio̍h無好ê，咱就當做提早知影，予家己心理有一个準備，按呢。

Q5. 開始做讀牌仔了後，佇生活中有啥物khah大ê改變？
　　變較無錢，講耍笑。因為我無kā人收錢，是靠逐家贊助，所致teh讀牌仔ê工課頂懸其實是無收入。
　　較大ê差別是人khah平靜，為tio̍h beh抽牌仔，一定ài有予家己平靜ê方法，按呢替人抽牌仔ê時陣才袂亂，袂講無法度解說。
　　閣有一个想欲分享ê，就是我咧用ê Waite塔羅是78張牌，有22張大牌佮56張細牌組成ê，22張ê大牌是一段佮心理成長有關係ê旅行，因為了改這个過程會按怎進行，對代誌會khah放會落心，較袂一種情緒影響家己傷久，算是一種真好ê改變。

Q6. 你對無仝族群進行讀牌仔工課ê感受是啥？敢有拄tio̍h啥難關？
　　我有時陣會去「免費市集」（華語），就是排擔ê人kā厝內猶koh好好ê物件提來排，m̄過想beh ài ê人m̄免用買ê，免費ê市仔，我會去遐替人讀牌仔。
　　平常時逐家會感覺塔羅是少年人ê物件，罕得看序大人抽塔羅，佇免費市仔khah有機會，in會問ê問題大部分kap投資khah有關係，算誠趣味ê經驗，m̄過按呢ê人客較袂轉來kā我講後來ê結果，所以我m̄知有鬥相共tio̍h無。
　　有一個較特別ê狀況會當分享，就是大部分，拄開始讀大學ê大學生，定定會想beh問「當時會有男/女朋友？」我攏會繼續kā問講「你這陣敢有對象？」誠濟是無，但是in攏會有一種足緊張ê感覺，敢若別人有交、我煞無，按呢足奇怪，這種我較袂予伊抽牌，會kā問「若準講牌仔ê結果是一年內攏無，到時你若拄tio̍h佮意ê人，你是beh逐抑是無ài逐？」這種代誌到尾仔猶是心內ê感覺上重要，你若拄tio̍h，你就會知，m̄免tio̍h急，若無mā袂要緊，有ê人一世人mā無想beh揣伴，人mā是活了好好。若是為tio̍h家己想beh ài，總是有人會出現，若只是感覺家己應該ài有，我會苦勸人客m̄免要意別人ê看法。

　　這改ê分享就到遮，向望有koh khah濟人加入書寫台文ê世界，多謝！