查某孫這馬２歲外，日時仔予奶母𤆬，欲暗仔𤆬轉來。每禮拜三早起，查某囝𤆬伊去參加一个囡仔團，佇大安森林公園，有一个老師媽媽𤆬囡仔耍，學物仔，譬論來講，元宵節進前畫鼓仔燈。
這馬干焦我共伊講台語，伊的外公可能嘛會講，按呢無夠，想欲予伊參加台語的囡仔團，會當增加聽別人講台語，佮別人講台語的機會，現此時的團攏佇誠遠，𤆬伊去到遐，感覺足忝耶！我一直無去聯絡。
伊誠活潑，逐工歸日走來走去，手誠賤，規厝內面的物仔攏提來耍。２歲了後，查某囝感覺奶母𤆬伊做的代誌無夠，佇揣幼稚園，我講傷細漢啦！上無愛會曉講話了後，才去讀，這馬猶袂曉講話，干焦佮奶母兜同齊𤆬的彼个弟弟拍來拍去，話講毋清楚，閣愛逐工佇園內規工，過團體生活，感覺足可憐耶！
這馬一禮拜去華語的團一早起，我閣𤆬伊參加一擺的台語團，學佮人鬥陣，按呢就會使啊！查某囝嘛同意。
昨昏看著「牽囡仔ê手 行台語ê路 」內底有一篇文章，佇講伊成立已經上國小的囡仔團的經過，後尾伊寫：
「因此鼓勵所有有參加共學意願但因現有的共學團在交通或時間上沒辦法配合、或是擔心該群小孩已經彼此熟識、自己小孩比較難打進去的台語家庭，建議不需要再猶豫，透過Line群招一個自己的在地共學團，抓準目標(讓小孩能用台語對外交流)並找出最適合的時間、地點以及高頻率的相聚機會，小孩很快就能交到自己的台語伴(大人也是)」
https://www.facebook.com/photo?fbid=939024904897658&set=a.385039526962868
是喔！會使家己來招一團，沒問題，我來招，歡迎逐家介紹爸母、阿公阿媽𤆬囡仔來參加。
●地 點：捷運台電大樓站附近。這四箍轉仔有溫洲公園，辛亥公園，客家文化主題公園，台大校園，大安森林公園。
●囡仔的年歲：２歲～國小進前
●時 間：拜一~拜五的早起時，一禮拜一擺
有興趣的人先私訊予我，咱先開講一下。
（2024.3.10.）（原貼佇面冊台語社團頂面）
