簡單想 bueh 寫寡感想卻發現寫這篇若蓋成 ē hőng 看做看票揣位 ê 感覺。總是冊讀煞 mā 搪著這篇早就設定好勢 ê 文章，愛我 uī-tio̍h 這款 m̄ 知按佗來 ê 情緒叨撚 teh 無枷夯交椅並違背家己 ê 個性莫寫一篇感想，彼 m̄ 是傷過假仙，彼是出家又帶枷 ê 無聊。
無聊歸無聊，總是拆白講我 mā m̄ 是自底就是按呢 ê 性地，起因我真清楚準做我已經按《後天美女製造機》升級到 m̄ 免閣倚靠機器來展現家己，總是《靈魂裏的胖女孩》猶原三不五時傱出來揣我𨑨迌。
每一个人有伊家己犯官欺，m̄ 通犯眾議 ê 想法，總是我這輩 ê kan-ta 若啥物攏驚，啥物攏 m̄ 敢做，閣 kā 無合理 ê 事項當做燉補來食，這正經是龜怪。我猶 teh 揣神魂 ê m̄ 知是熊抑是虎，總是我知影跤步踏無出去，kan-ta bueh 按呢雙跤踏雙船，心頭只有亂紛紛，無法度粗糠還(huān)粗糠，冇粟還冇粟來做代誌。關於這本冊，拆白講 tī Books 博客來搪著伊我第一个想法是傍語賣文 — 傍臺語賣華文 tshan-tshiūnn《後天美女製造機》按呢利用一台機器調整家己 ê 不足。我 m̄ 知影別人 tuì 90%華文透濫10%臺文 mā kā 號做「臺語文文學」有啥物想法，總是我個人 tuì 這款寫作方式是按呢分類「牽尪姨，順話尾」，我知影按呢比論真龜怪，總是尪姨敢 m̄ 是順人 ê 意愛調整伊 bueh 講 ê 話來得著金銀財寶，所致這本冊一開始並無吸引我 ê 烏白雙仁。總是，bué 冊 mā 是一件有緣做牽手，無緣做朋友 ê 過程。
本底是想 bueh bué《三台風e風》m̄-koh 金石堂佮聚珍臺灣攏無通試讀內文，有通試讀 ê 部份是作者 ê 臺華「踏頭話」，捌 bué 過這類出版品 ê 我無想 bueh 繼續支援我 buē 讀 ê 部份，就隨放棄踅轉去博客來愖《語言學家破解台語》。
作者是 tsiâ 照實講低路人我 m̄ 捌，總是網路無界限，迵過網路「台/臺語」搜揣 hōo 我有機會 tī《關懷文教基金會》搪著作者 ê「台語華語文法真無仝」ê 講座， 這篇精彩 ê 講座 mā 成做消敨死窟仔水 ê 涵空(âm-khang)。雖罔我讀無啥有，總是人食魚，魚食水，一本讀無啥有 ê 冊猶原 ē 引𤆬家己按 m̄ 捌戲文，大氣捎 leh 歕成做 m̄ 通怨嘆生做䆀，媠䆀攏有好人才。
講讀無啥有 m̄ 是講冊歹讀，是家己 tuì 文法有一个慣性就是背，所致一搪著按人喙講抑是寫 ê 文法佮我背過 ê 123456 無相仝，我就隨拍結。這本冊有紹介 tsuē-tsuē 認捌 ê 文法，總是遮 ê 文法解說猶是比 buē 過臺語文法𤆬 hōo 我 ê 自在，準做我一直掠做我攏是講「食飯飽」m̄ 是「食飽飯」我 mā buē 因為受著這个「文法」錯誤感覺家己是笨桶，顛倒有一種我是 Friedrich II. (HRR) 研究室 ê 紅嬰仔 — 猶 buē 曉講話 ê 紅嬰仔 tī 無人育飼 ê 狀況 ē 講啥物話。
我清楚知影 tsuē-tsuē 人捌講過我 ê 臺語怪怪抑是 buē 扭掠，總是烏頭鬃 ē 變白，歲頭 buē 減少，是「See」抑是「Watching」是講「大丈夫/tāi-tiōng-hu」、「大丈夫/Daijōbu」、「大丈夫/ㄉㄚˋㄓㄤˋ ㄈㄨ」，羅馬字 tsiâu 是英語 ê 是「禮物/Gift」抑是「毒/das Gift」遮 ê 問題攏 m̄ 是問題。起因準做 ē 曉講六種語又閣 hōo 德國人算入德國歷史 ê Friedrich II(HRR)，伊猶原上要意 Palermo。這段話是啥物意思，無啥意思 kan-ta bueh 講每一个語言有家己 ê 特殊性佮使用這个語言 ê 人獨有 ê 愛情。
是按怎愛講「下晡/E-poo」buē 使得講「下午/Hā-ngóo」，是按怎 bueh 講「Café」m̄ 講「Coffee shop」，明明就是德語「Zum mitnehmen」是按怎 bueh 講英語「To go」，是按怎，是按怎，是按怎！！！
無按怎，一切就 tshan-tshiūnn「大丈夫」我都唸大丈夫，你呢?(P.20) ê 分張相𫝛，無一个絕對 ê 會使得交佮 buē 使得 kan-ta 看角勢佮使用方法。像咱看美國電影捷 ē 聽著 ê「Shit」這款敨放情緒壓力 ê 起鼓句 tī 德國，我講 ê 德國無表示全部 kan-ta 我生活四箍圍仔 ê 德國人，𪜶 buē 講「Scheiße」𪜶 ē 講「Mann」來表示情緒 ê 懸低，所致 bueh 知影德國人這久 ê 情緒壓力是「五燈獎幾個燈」，聽「Mann」大概掠有9成。
冊讀煞我 tuì「m̄」、「bô」佮「to」、「lóng」猶原霧嘎嘎，總是語言是活水 m̄ 是死水，我講 ê 話你 m̄ 捌聽過無表示伊 m̄ 是一句話。你認為彼是別人 kā 你抄襲，總是你敢確定 m̄ 是你 ka̋ng 提來做副本使用？像「Kopf」猶未出現進前，你敢有法度確定這个你 m̄ 捌看過 ê「Kopp」m̄ 是「頭」ê 意思。
閣舉一个例，一个華文 ê「雅典」tī 希臘當地 gún 搪過遮 ê 寫法「Αθήνα」 、「Ἀθῆναι」 、「Athína」 、「Athens」，kan-na 捌「Athens」這个寫法佮講法聽著別人講「Αθήνα」 、「Ἀθῆναι」敢表示「Αθήνα」 、「Ἀθῆναι」就 m̄ 著？
我 m̄ 是希臘人我無標準答案，總是我清楚知影當我講「Αθήνα」 、「Ἀθῆναι」當地人攏 ē kā 我褒嗦講「你 ê 希臘語講甲誠好」，準做我又閣見看「Αθήνα」 、「Ἀθῆναι」我猶原是「借問咱是 tsiâ」。
最後我 bueh 複製作者 ê 溫馨(un-hiong)提醒「反正市面上也沒有其他台語文法書，所以你也只能看這本了。」我個人 tuì 語言有興趣，總是一搪著文法教學工具冊從來 m̄ 捌投資，準做投資 mā 從來 m̄ 捌反過第三頁，這本《語言學家解破台語》是我食到這个歲唯一一本自頭讀到尾 ê 文法工具冊。這敢是語文大細心？𠊎毋知，不而過「足以大亂十字路口的『予過！』」hōo 我足有畫面。
起因我順自來 ê 慣勢 kā 無車翻譯做「Kein Auto」hōo gún 翁成做柴頭 kā 車擋恬，實踐作者阿爸同事 ê「無毋著啊！予過，所以我停落來，予人先過毋。」這段「予過」ê 斟酌寫到遮，有興趣理解甲閣較斟酌，請家己拜讀這本台語文法冊。德國人按怎講「予過」？
「Ist Frei」Frei 是自由、無料 ê 14，tī 公路駕駛伊是火烌性 ê「予過」交「緊過」hâm 有閬縫 ê 通過，總是這 Frei 就 tshan-tshiūnn 作者分張 ê「代名詞通常會指向某個對象，但有些代名詞找不到指的究竟是誰？！」
德國交通工具利便 hōo 我免減歲數交德國做𪜶 ê 車神，所致 gún 兜 kan-ta 一位車主，彼就是 gún 翁。見交伊做陣駛車出門，德國人 ê「予過」、「緊過」hâm 有閬縫 ê 緊過就成做我 ê 德語德國化 ê 考試，不而過自交往到今這个德語德國化 ê 考試從來 m̄ 捌行入心肝穎，我猶是慣勢講 Kein Auto 無車 hōo gún 翁 m̄ 知愛「予過」、「緊過」抑是利用有三台車 ê 閬縫緊過。
Ist Frei ê 原句是 Die Straße ist Frei，不而過受倒爿駕駛 ê 影響，𪜶較慣勢講 Rechts ist Frei kā 路這个主詞直接提掉換做 die Richtung 方向 ê 代名詞 Rechts。我 m̄ 知影現此時 ê 台灣朋友按怎 tuì 駕駛講「予過」、「緊過」hâm 有閬縫 ê 緊過，不而過我自囡仔時就慣勢講「無車」意思是咱 bueh 過 ê 這時正港無半台車，緊過。
德國人駛車若腹肚疼趕 bueh 走便所 ê 緊，加上身為歐洲重要 ê 交通肢骨愛我入港隨灣，入鄉隨俗 kā 家己成做若西班牙鬥牛士按呢自在面對若鬥牛 ê 車喝 Ist Frei 緊過，足僫改，不而過 gún 翁 mā 有相𫝛 ê 問題。Gún 雙方猶 teh 互相學習伊 ê Ist Frei 是講車交車有閬縫「緊過」、「予過」，我 ê Kein Auto 是講目前看無半台車，咱會使緊過 m̄ 是愛等到規條路攏無車 tsiah 緊過。
2023.06.01
