【學台文日記】痟學台文ê初衷

自頭開始學：學華語共（kā，和）學台語，經驗完全無仝

我向望家己慣勢(Kuàn-sì)用台語思考，既然寫字是我慣勢的思考路徑，用台文那寫、那思考，對我來講是必要 ê。所以，我開始練習寫台文，直接想台語、共台文寫落來，希望有一日可能會當成作「台語腦」。

我自頭開始學，學了發音，換學聲調；拄著啥物(Siánn-mih)字無確定按怎讀，攏去查字典。寫一篇文，定定寫一晡久---不只喇，是三晡久、三工久攏有喔，這一點仔攏袂譀古(Hàm-kóo)，就是遮爾(tsiah-nī) 久XD--而且，卡寫嘛彼(Hit)幾字，完全會使(ē sái)了解小學生寫作文ê心情。彼種㧎㧎(Khê-khê) ê 感覺，予我真正感覺著對這leh語言ê「生份」。

後來，因為開始讀台文囡仔古予囡仔聽，我發現na讀、會當na學著誠濟 (tsē，多)字，嘛會使學著一寡仔寫作的方式，所以我開始沓沓仔(Ta̍uh-ta̍uh-á)讀各種台文作品。慢慢仔，拍字變緊ah、會曉的字愈來愈濟、讀起來嘛著較慣勢ah。（嘛開始共囡仔講母語，毋過，這功課猶閣足濟，我另外來記錄）

嘛是因為讀一寡仔作品了後，開始調整寫台文ê方式。比論講，進前想欲寫台文了後，閣再加寫華語，予看無ê人看 (頂一篇有寫著詳細的原因)。毋過，一篇文愛寫兩、三遍，實在是傷(Siong) 忝(Thiam) 矣拉！忝甲我攏無動力寫矣XD 顛倒毋敢寫，毋就失去意義？

而且，看了小王子台語版本了後，感覺著台語真正是誠媠、也自帶情緒變化ê語言，你那看、就那無細膩(Bô-sè-jī) 就唸出來啊！這嘛親像是寫的人、共看的人之間，真珍貴ê互動ah！所以，慢慢仔我嘛改用「漢羅併用」ê寫法。

奇妙的是，這種種的想法，學寫華語的時並無感覺著，學台文的過程，顛倒定定leh「反省」。

我 leh 臆(ioh，猜)，學習過程無仝(Kāng)，真正會留落來在心中ê，是完全無仝ê物件(Mi̍h-kiānn)。

學華語ê過程，是因為我「必須愛」學，所以伊就敢若（kán－ná）親像「資訊 (Tsu-sìn)」入去我ê頭殼，學著ê物件、共生活中開喙leh講ê物件，是連袂起來的兩回事；但是，學台語是我真「想欲」學ê，我對伊有向望、有感情、有衝碰(Tshóng-pōng)，所以我那leh學，就那想欲挖出這个語言ê故事、想欲緊甲伊囥(Khǹg) 佇我生活內底。這是兩種完全無仝ê學習感。

話閣講倒轉來，我的衝碰是為著啥物？

自我作一个媽媽以後，對「母語」的好奇是一个起點，而且愈來愈濟。我好奇，以後我的囡仔，會認為in的母語是啥物語言咧？

後來，講台語的阿華師、陳伯惟用台語去談論公共議題，這群人的影響一定是有ê。毋過，我必須承認：進前我看in ê影片的時陣，雖然心內真「感動」，但是我無任何「行動」。

感動真重要，毋過無一定代表隨（suî，馬上）來「改變信念」。「改變」是一leh過程，一點一滴ê累積，終其尾，總有一日，彼个門就會拍予開。（這對我來講，嘛是真重要的提醒！）

我彼个門拍開的關鍵，回想起來應該是，一堂阮查某囝 ê 暖蛇 (讀做「賴賴趖」，luā-luā-sô) 自學課，完全「改變」我的「信念」。

佇一擺ê「台灣歷史課」內底，阮設計一leh 關於二二八事件ê歷史課，安排演出天馬茶房ê事件發生經過予囡仔看。我負責演賣薰 (Hun，菸) ê 「林江邁」。

當我演著當時政府不准百姓講台灣人家己ê語言---台語，我配合劇情，規个人跪佇塗跤(Thôo-kha)，用台語甲警察大人求情、求伊放我煞。我嘛用台語甲上課ê囡仔求情，求in幫我翻譯。仆佇塗跤的角度，看啥物攏真卑微，彼種「求人予我生存」ê感覺真強烈。

我ê身軀就按呢，共這leh「強烈求生 ê 自我認同感」記起來矣。

過幾工，我佇Dcard頂面，看著一leh大學生講：伊感覺「不會講國語的老人很煩耶」、「自己不求進步、還要年輕人遵循傳統回去講方言」、「明明國語是第一官方語言」、「國語就是要給不一樣的族群，有共同的橋樑」遮ê講法。

我真正看甲規腹肚火。台語是按怎行到這步个？

佇彼leh時陣，我決定，欲好好仔共台語抾(Khioh，撿) 轉來，

通往家己ê路，從來毋是好行ê路

除了會曉講，我閣想欲記錄這个語言。

會使記錄的話，有文本、有字，這个語言予人有機會重複學習、查證、研究，按呢，伊流失的機會，敢會較低咧？若有一日，講台語的人攏死啊，毋知遮的文字，後代的人閣願意讀無？

我心內嘛足清楚，過去30冬ê文字能力，完全是建立佇華語ê基礎之上。毋管華語寫作偌(Guā)順手，當我決定袂用台語書寫ê時陣，彼又閣是另外一件代誌矣。我若是想欲甲我過去30年所「流失」ê 補轉來，這个「欠缺閣生份」ê過程，是一定愛比自細漢就足gâu講ê人辛苦。

毋過，這个我必須愛用喙(Tshuì，嘴巴)、用眼、用頭腦去回想細漢時聽著ê一切ê過程，嘛是另外一種「朝聖之路」。

只不過，這條路毋是通往神，是通往家己。

而，通往家己ê路，從來毋是好行ê路。