逐工寫一段（台文）５—６

５．幾若工沒寫，

因為出門，沒佇厝。

公視台語台真好，毋但會使聽到真濟台語的講法，猶有寫法，看字幕嘛會使學真濟台文。

我嘛定定看客家電視台，我感覺𪜶的節目真好看，尤其唱歌的節目，除了傳統客歌以外，猶有現代創作歌，足好聽。

---

６．「我佇𤆬孫，無閒啦！」

幾若年前，我因為漏尿去病院看醫生，佇我頭前有一个阿媽，醫生要她佇厝內家己做「凱格爾運動」，伊講：「我佇𤆬孫，無閒啦！」

我聽著心內感覺足艱苦耶！

講著阿媽𤆬孫，乎人感覺是真好，真溫暖的代誌，毋過，阿媽已經無閒一世人啊！囡仔大漢了後，應該去運動，保養伊的身體，去交朋友，培養一寡仔興趣，去做伊愛做的代誌，閤較老的時陣，孫大漢，厝內面的工作沒才調做的時，才袂無議量（無聊）。

彼个阿媽看起來真濟歲，𤆬孫煮食一定真無閒，家己的代誌就煞煞去，可能連出來看醫生攏真困難，漏尿無藥仔通吃，愛靠做「凱格爾運動」來改善，醫生叫伊做，伊講無閒，轉去一定無做。

可能囡仔予奶母𤆬會毋甘，阿嬤閒閒無代誌，嘛會使做伴，其實𤆬囡仔是無快活的代誌，我36歲生第三个囡仔，𤆬得足食力，五、六十歲時，我一定沒才調𤆬孫。

老母一世人攏為孫為囝犠牲，連家己的健康嘛無時間通顧，這毋是「偉大」，是共老母賰的價值欶乾乾，唉！

（2019年寫）

---

＊＊台文不會寫，不會唸？ 查這裏