佇台北，台語嘛會通

這一、二年來，不但查某孫有佇面頭前的時，我講台語；伊無佇咧，我佮其他的囡仔嘛講台語；毋但佇礁溪講台語，慢慢仔佇台北的店內嘛講台語，佇台北閣較需要較長的時間培養講的勇氣。

這幾若个月，不管是啥物店，對方幾歲，我開喙就講台語，伊欲用華語，抑是台語應我攏無要緊，有應就表示伊聽有，伊若聽無，伊會講伊聽無。

到這馬為止，干焦拄著一个，佇我台北厝附近的便當店，我定定去買的。有一擺是一个佮我年歲差不多的中年婦女，我講台語，伊講：「我不會台語，我是外省人。」好，後擺拄著伊，我就講華語，其他的人攏共伊講台語。我佇台語社團講這个代誌，有人回應講，拄著伊嘛照常講台語。

其實，逐家攏聽有，毋是少年人就袂曉，無一定，有的少年人嘛誠𠢕 gâu講，毋免用我家己的想法去想別人，攏用台語講就是，有講出喙就有算是。

講台語，當時行，寫台文嘛是。

這篇是我５月22日寫的

作者攝