雙腳間嘅距離·點解弓道要擘到對腳咁開？

日本弓道「足踏」要點同理由

足踏嘅要點

日本弓道射法八節中嘅「足踏」，有三點要求：

1. 兩腳腳尖連成嘅延長線要指向靶
2. 兩腳分開嘅距離大約係自己矢束嘅長度
3. 兩腳展開嘅角度約60度

足踏み

呢三點有乜咁重要？

（以下係個人見解，並未查證弓道教本有冇相關內容。）

側身對靶

第一點唔難理解，咁樣能夠確保側身舉弓自然就指向箭靶，唔使轉動上身或者橫移手臂去瞄靶。

分腿站立

點解要分開雙腳站立呢？

胴造嘅基礎

人體嘅各個關節互相連動。當我哋舉起啞鈴時，除咗手臂嘅二頭肌、三角肌會發力外，腰、背、腿部嘅肌肉亦會同時出力去支撐弓嘅重量同維持身體嘅姿勢。

射箭亦同樣道理。拉弓需要穩固嘅軀幹同下肢作為肩、臂發力嘅基礎。下盤鬆散會難以發力，射姿亦容易變形，影響施力嘅方向，箭就射唔準。

適當分開雙腳嘅站姿，一方面分散支撐點，能夠令重心更平穩；一方面雙腿外展時，髖關節肌群能更有效地參與穩定盤骨，防止左右傾側（「懸る胴」、「退く胴｣）。

用天秤（塔式起重機）比喻嘅話，手臂、軀幹、雙腿相當於秤臂，架身、秤腳，而分開雙腳相當於一塊寬廣嘅底座。

弓道比西洋箭雙腳分得更加開

西洋箭嘅站姿，一般會分開雙腳約兩肩嘅闊度。而日本弓道嘅「足踏」，雙腳分開嘅幅度大約係矢束嘅長度，同雙臂水平展開時手㬹嘅闊度差唔多。

點解弓道「足踏」要分得比較開？

弓道同西洋箭嘅拉法差異

弓道同運動射箭嘅推弓發力方式大同小異，同樣以前肩嘅前鋸肌、三角肌為主力，但引弦方式就好唔同。

運動射箭流行嘅引弦方式，相對來講屬於短拉距平拉法，主要運用到嘅三角肌、斜方肌，從胸椎、肩胛、肩峰收縮、帶動後手臂引弦。上肢嘅運動軌跡偏向在肩膊嘅水平面上。

而弓道射法八節中，由「打起」、「大三」到「会」嘅引弦方式，屬於大拉距上壓式拉法，手臂高舉過頭、運用背闊肌，從腰椎、盤骨收縮，帶動上臂肱骨。上肢嘅運動軌跡偏向喺垂直嘅冠狀面上，從上而下。

拉法差異對站姿有唔同要求

弓道的引弦方式，借腰部、盤骨發力，較容易令腰部側彎、盤骨傾側，因此需要雙腿分得更開嘅站姿去穩定下盤。

外八字腳

自然外旋

點解要外八字腳？

因為雙腿分開時，大腿會自然外旋。

大腿外旋嘅原因：站立時負責分開雙腿（髖關節外展）嘅作用肌群：（主要）臀中肌、（輔助）臀大肌和臀小肌，收縮時會同時有髖關節外旋嘅效果。

咁所以，外旋嘅應該是大腿，而唔係腳掌。

外旋幅度

點解要外展60度，而唔係更多？

外旋角度太大嘅話，會有以下不良效果：

1. 身體前後嘅支撐點太狹窄，容易重心不穩，前俯後仰（「屈む胴」、「反る胴」）。
2. 臀中肌收得太緊，會容易疲勞。
3. 臀大肌收縮嘅作用，會由本來嘅髖關節伸展為主，漸變為更多嘅外旋，因而削弱咗減少盆骨前傾嘅效果。

故此，若然「足踏」時出現越係收緊臀部，雙腳會越滑越開，可以試下略為收緊、內旋大腿內側，以產生一定嘅抵抗力避免大腿過度展開、外旋。

結語

綜上所述，「足踏」嘅目的，係為咗從雙腳開始，建立合符人體構造、能夠對射箭動作提供穩固支撐嘅站立姿勢。