「做塊階磚給你墊底」

《職場演義》呢個系列寫咗好幾篇，主角由足球明星寫到去教練，最近連一級方程式車手都寫埋一不離二，繼拉高倫之後，我想介紹多一位車手：保達斯 (Valtteri Bottas)。

無獨有偶，保達斯同拉高倫一樣來自芬蘭。佢喺 2018 年嘅賽事入面，為平治車隊效力，以二號車手身份，為隊友咸美頓 (Lewis Hamilton) 護航，係「黑帝」第五度奪得全年總冠軍，以及平治車隊連續五年獲得車隊冠軍嘅主要功臣。

保達斯呢位車手本來就冇乜星味，難聽啲講係面目模糊。或者因為佢嘅光芒完全被冠車級人馬咸美頓及維達爾 (Sebastian Vettel) 蓋過，而其他車手，例如年少氣盛嘅韋斯塔本 (Max Verstappen) 同埋平易親人嘅列卡度 (Daniel Ricciardo) ，性格上亦較諸沉實內斂嘅芬蘭人鮮明 (拉高倫表示躺著也中槍) 。

不過，由於 2018 年賽季競爭相當激烈，保達斯喺牽制法拉利車隊嘅維達爾同拉高倫方面作用就相當明顯。或者你以為賽車純粹鬥快，但係戰術上，或者駕駛技術上，都的確有所謂防守嘅概念。守得好，其他車手要用更多時間同資源 (即係車呔損耗) 先至可以追咸美頓，呢個就係保達斯嘅價值。

更加令人印象深刻嘅，係賽季中後段嘅俄羅斯站，明明保達斯表現較咸美頓更佳，排頭位出賽又一直領先，但係平治車隊為咗鞏固咸美頓喺車手榜嘅優勢，不惜落個 team order 迫令保達斯讓路，畀咸美頓揚長而去摘冠之餘，自己仲要殿後頂住如狼似虎般進逼嘅維達爾。賽後捱到第二名衝線嘅保達斯面口當然唔係好好睇，但係「顧全大局」四個字係份糧包嘅，何況保達斯晨早同車隊續咗約，大家嘅合作關係並冇受到呢次小風波影響。

保達斯對咸美頓同車隊嚟講可算係「無名英雄」，而我亦認識一個「職場保達斯」。以年資同職銜計，佢絕對係「阿哥」級人馬。不過，佢行出嚟，無論係氣勢抑或係談吐，都反映咗佢頂多只係「二哥」：佢有足夠嘅智慧為老闆出謀獻策，但係要擔大旗去動員其他人開工呢，就欠缺咗啲領導力、威望同埋魅力。

「職場保達斯」有佢天生嘅缺點，但換個角度睇，呢啲亦都係佢嘅優點。咩角度，老闆嘅角度。老闆麾下粒粒皆星、砌到明星隊出嚟當然好爽，但係明星通常都有性格，要佢哋肯抵諗啲同你做某啲 dirty work 或者捱意氣食咁隻死貓？唔係唔得，下次你搵咩補償佢？

呢個時候，老闆就會諗起「職場保達斯」。冇架，有啲咩豬頭骨「硬嘢」，就徵召「職場保達斯」嚟幫手囉。反正佢使命必達，又唔介意蝕底，怨言極少，老闆委以「重」任之後，基本上可以安枕無憂。公司早幾年要整頓內部事務，為前人積落嘅「蘇州屎」執手尾，「職場保達斯」就當仁不讓地擔任呢個「清潔大隊長」角色，乾淨俐落地完成任務。而呢啲任務，搞掂咗都唔會有掌聲架，莫講話獎金。

我諗「職場保達斯」呢種謙厚、和氣嘅性格，可能同佢本身係虔誠嘅教徒，以及佢都仕途見頂，不求上進，但求平平穩穩、賺錢供書教學，唔經唔覺就退休。如是者，歷朝老闆都知道「職場保達斯」忠心耿耿，可堪信賴。有舊咁穩陣嘅階磚墊底，業務發展先至無後顧之憂。呢個，正正係「職場保達斯」嘅價值。