我看冊的時，定定看著一句話，有真濟作者共我轉達講：「人為著朋友獻性命，疼無有比這个較大的。」我時常咧想，「疼」這个字，用佇朋友的關係，敢袂傷過重矣？總是，佇我眼內的彼个人，阮毋捌有愛情的甜蜜，嘛無阮會當做伙行到路尾的，幸福的向望。雖然我確實嘛捌想過：若會做得，彼時佇伊身邊，牽伊的手的：是我閣較好。
猶會記得以前阮作同學，逐工咧鬥陣的時，煞感覺若有一堵壁隔佇阮中間，予阮不時互相誤解。但是，阮佇彼兩爿徛咧遠遠對相，猶是知影：佇家己的心內，對方變甲愈來愈重要，愈來愈放袂離。哪會去想著講：阮不過是起一个冤家，連鞭就畢業、分離；就按呢無閣交流矣。一直到一年過了，阮才閣有彼个勇氣，去面對、去重新聯絡。
這擺，佇電話兩爿遠遠咧講話，阮煞頭一擺有這種感覺。我臆會著，佇伊的吐氣中，我會聽見講：其實伊是咧驚啥，以及伊心內到底是向望啥物。當我失志的時，伊嘛會替我揣著我的好，陪伴佇我的邊仔，予我鼓勵佮安慰。阮開始會當坦白對對方講話。佮以前無仝，阮真正變做對方的的知己矣。閣過兩冬，伊共我講：佇我所無熟似的所在，伊有拄著一个誠適合的人；所以怹愛欲兩个人，做伙進前。我感覺有一个氣深深吐出來，對我的胸坎。親像風。一个朋友、一个知己，敢若是厝內人。大概，共家己性命的大細項代誌，攏總分享予另外一个不過是「朋友」的人，以後就袂閣有矣。我實在真替伊歡喜。因為，我知影伊是一个足認真的人。伊定著會用坦白佮寬容來相疼，疼彼个伊家己所選擇、所意愛的人。你看，偌濟季節過去矣。怹敢毋是猶咧行，猶咧路裡相倚？
我袂閣對伊講：阮欲按怎按怎；嘛袂閣對伊講：「咱中間無祕密。」伊有屬佇怹的空間。但是我會繼續尊重伊，寶惜伊。因為疼，毋是愛欲別人照家己的意思來做，疼是「為著朋友獻性命」。
附記：本文原為109年「全國語文競賽之閩南語朗讀文章」而作，惜未中選。今以自由授權全錄於此。
本著作係採用姓名標示-相同方式分享 4.0 國際授權。欲查看本授權條款副本，請到https://creativecommons.org/licenses/by-sa/4.0/deed.zh_TW。
