台語新詞放送．beh 哭，beh 鬧，閣 beh 吊脰

Tsit 久看公視台語台的法律劇《無罪推定》，我足佮意--ê！其實劇情算 put-lí 硬，就是 beh 予人思考咱司法體制佮死刑 ê 問題。毋過我上注意 ê 當然 iáu 是台語 ê 部份啦。我感覺伊 ē-tàng kā「台語是粗俗--ê」ê tsi̍t 種偏見 píng 輾轉。內底閣再專業 ê 律師 uân-nā 講全台語（閣有一个一直 làu 英語--ê 啦😆），而且拄著真濟法律名詞，按怎譯做台語，抑是用 khah 白話 ê 用詞講出來，攏真考驗語言功力。台語指導是陳豐惠老師，台詞自然就無啥問題，毋過有一寡演員台語入聲／m 韻尾一下講緊就 khah ē 無去，咬字可能愛閣注意。

今仔日 beh 分享 ê 是內底聽著足心適 ê 講法：beh 哭，beh 鬧，閣 beh 吊脰。真明顯，這就是華語『一哭，二鬧，三上吊』ê 台語翻譯，毋過以前無想過，翻做台語韻律感煞 ē 加強！本來干焦『鬧、吊』兩字有押韻，台語竟然變做「哭、鬧、吊、脰」四字攏押韻，甚至予我懷疑 tsit 句話是毋是本來是台語（結果我查過毋是啦）！

除了「beh 哭，beh 鬧，閣 beh 吊脰」按呢講以外，直翻「一哭，二鬧，三吊脰」我感覺嘛完全 ē 通！逐家感覺咧？