德國（西德）自 1970 開始推捒無肉人生到今倚 bueh 一甲子 ê 時間，因為動物權利(Tierwohl)交選擇回歸祖先植物食食 ê 族群愈來愈 tsuē，hōo gún 這个連郵便利 mā 選擇退場 kā 業務交 hōo 車頭𥴊仔店為民服務 ê 田庄超市，mā 沓沓仔出現向時 kan-ta ē 出現 tī 鞏金閣包銀有機商店 ê 豆腐。
這款現象 tuī 盡心推捒減肉食食 ê 醫療是好 ê 開始 mā 是加吞頭疼藥 ê 開始。起因倚 bueh 一甲子 ê 植物食食 tī 這十外冬 mā 勻勻仔增加醫療負擔，特別是現此時 ê 素食現象 Like Meat, Like Fish（素肉）造成 ê 新陳代謝症 ê 增加已經無比傳統 kā 肉做飯食 ê 人閣較少。簡單一句咱番薯島面對少子化 ê 國安問題，德國是面對 tsuē-tsuē 囡仔猶未轉大人就得著二期糖尿病 ê 國安問題。
Gún 翁第一斗來台灣牛郎織女會見 gún 兜 ê 食飯桌是 gún 阿母一碗白飯敆牛肉青菜，我一碗白飯敆豆腐青菜，伊掠做我 uī-tio̍h 伊踮德國做素食者感動甲目箍紅，押尾發見代誌 m̄ 是伊想 ê 遐爾仔甜蜜隨講一堆食肉健康顧身體，青菜豆腐白汫無素伊無愛。食食足個人，我無回應伊 ê 交代，起因尊存是按心 ê 目睭開始 m̄ 是按喙像𪜶兜 ê 愛。只不過這个按心 ê 目睭 ê 尊存愛經過十外冬伊 tsiah 有才調理解。這久翻頭看這條上四常 ê 寧靜食食革命，我真正欽佩家己。Tī 素食市場猶未楦闊到 Lidl, Netto 遮 ê 平價超市，來德國牛郎織女會我 buē 專工 uī-tio̍h 一塊豆腐盤 40 分 ê 車幫去中央車站 ê 中國超市 bué 豆腐，自家甲做踮遮我較按怎好喙斗入人門，順人意食在地好料，屬於我自來 ê 喙斗猶是逐暝來相揣 hōo 我骨力盤車去中央車站 bué 豆腐。總是綿豉捙拚 buē 過年歲交人兩跤，錢四跤 ê 現實，我就沓沓仔改豆腐換食肉。
2017 辭掉頭路來德國好好做一位好牽手到 2024 ê 這段期間合該然是我人生食上 tsuē 肉 ê 日子，起因德國 ê 魚臊是連蹛海港 ê 人 mā 講食 buē 起 ê 貴參參。正經無白賊以這期 ê Lidl 做比喻，三文魚一公斤 23€，豬肉豉仔一公斤 4.58€，牛肉豉仔一公斤 7.99€，雞襟胸一公斤 8.19€，平平是肉當然 mā 是食肉較顧錢袋仔。
巡田園翻田園，記錄 tī 痞客邦 ê 最後一斗豆腐食食是 2022.6.15，順這个記錄翻頭算無佮豆腐相借問拄好是三冬閣一月日半。這三冬除了時間無夠冗剩 hōo 我有才調慢慢仔延續兩人一雙箸 bueh 食無仝味 ê 日子，閣有烏露戰爭帶來 ê 變化。
2021 年兜 gún 這个四箍輾轉齊是田園 ê 田庄受素食人口增加，屬中懸價 ê REWE 開始賣德國製 ê 豆腐 hōo 歇 bueh 2 冬無食豆腐 ê 我有機會利用歇假 kan-ta 一个人踮厝 ê 時間靜靜仔享受屬於家己 ê 亞洲味，不而過自露西亞講烏克蘭 kā 𪜶欺負甲四角磚無一地通踏，自本就生食無夠閣通曝乾 ê 豆腐開始漲懸價，上懸漲甲 3.29€ 400g hōo 我自願放棄亞洲喙白翻頭成做德國喙斗。
2025 因為 WWF ê 好鬥陣 kā 豆腐價數降到比 2021 閣較美麗 ê 價數，見著雞襟胸無特價漲懸價到 10.99€，豬肉豉仔 7.99€，牛肉豉仔 11.99€ ê gún 翁開始轉喙斗 tuì 豆腐有興趣。我就按兩人一塊豆腐開始 hōo 伊試鹹汫，試到目今伊講豆腐好味素。這个好味素是價數影響抑是真正佮意豆腐我無興探討，總是自伊願意食豆腐，我 ê 豆腐人生總算免閣看日子安排。
這份食譜是按到目今按車頭轉來厝齊 ē 巡菜股 ê 超市所看來 ê 食譜，伊號做「素食者 ê 燉肉」 Veganes Gulasch。2022.06.15 ê 成品受厝內無 Kam-má-tooh mā 無罐頭 Kam-má-tooh 就順肉じゃが ê 生張料理。2025 ê 這久鮮沢 Kam-má-tooh 自漲懸價 m̄ 捌踅翻頭轉來到 0.89€/kg hōo 我揣著水牛過溪——厚屎尿合理家己 ê 貧惰骨，就斟酌 kā 伊出菜 hōo 伊交原食譜有 50% ê 相𫝛紅記記。
台灣人講話愛耍倚音，食物 mā 愛倚形，自第一斗交伊相拄搪我 kan-ta ē 曉以華語倚音 kā 伊號做「豆腐古老師」總是「古」是「ㄍㄨˇ」m̄ 是「ㄍㄨ」就順德國素食者 kā 伊取來做肉 ê 喙斗翻譯做「燉素肉」。2025 重新翻草，凡勢有讀書所致想著這兩句：
1. 豆腐龜老師，龜 tī 咱 ê 文化有長壽 ê 意思，德國人推廣食素除了動物福利 mā 有健康 ê 推廣，我就順這个「Gu」ê 音轉做台語 ê Ku 成做豆腐龜老師。 寫著龜老師德國人 tī 頂世紀確實食龜肉，而且閣出龜肉罐頭。
2. 豆腐蓇老師，蓇 tī 華語是花無開好勢 --- 「蓇ㄍㄨ」，這个意思 hōo 我想著，一粒大豆按枝豆成做黃豆接紲轉做烏豆 ê 過程，「蓇ㄍㄨ」是植物，意思是花無開好勢，豆腐按囡仔轉少年，押尾無轉成(tńg-tsiânn)做青年成做烏豆，按呢我就順這个變化 kā 伊號做豆腐蓇老師。
