〈Koh sī 228…〉

Koh sī 228

Lán iáu koh teh chhéng-kiû

Beh 80 tang--ah, oa̍h--lo̍h-lâi ê chhin-cho̍k

In iáu ē-kham-tit kúi ê chhun-hā-chhiu-tang?

1 pái koh 1 pái si̍t-bîn-chiá kóng beh kak-chhíⁿ

Kóng in beh chò Tâi-oân-lâng

Hoan-thâu to̍h chò in khèng-chiok 連假228

Chèng-gī bē-su sī ní âng ê ōe-seng-chóa

Kō͘ lán ê hoeh thè in chhit-kōaⁿ

Kō͘ Siōng-tè Pu̍t-chó͘ ê chû-pi

Khèng-chiok só͘-ūi ê BÎN-CHÚ IAN-HOA

Ah lán ê chèng-gī--leh?

Ka-hāi-chiá kám í-keng siū sím-phòaⁿ?

Lán ê khó͘-lān m̄ sī téng-bīn tà-bông-bū

Lán sī téng-sin hông tēⁿ lo̍h thô͘-kha

Hông só nâ-âu kê-á

Gia̍h pit ê chhiú hō͘ CHÓ͘-KOK BÛN-HÒA kòng tn̄g

Liân gí-giân kap bûn-jī mā hō͘ in thè lán koat seng chù sí

Ah lán ê chèng-gī--leh?

Siáng beh thè lán chú-chhî chèng-gī?

80 tang--ah

Taⁿ koh ū lâng kóng i chit-má chiah chai-iáⁿ

Goân-lâi m̄-nā 1 pái 228

Goân-lâi ROC, Chină kiōng-hô-kok, to̍h sī in ì-ài ê kok-ka

Goân-lâi tiān-sī tiān-iáⁿ iáu koh teh sé-náu lán ê gín-á

Oa̍h--lo̍h-lâi ê chhin-cho̍k

Iáu ē-kham-tit gōa chē chhun-hā-chhiu-tang

Piàⁿ soán-kí ê bîn-chú bûn-hòa

Tì-sú chèng-gī tio̍h-bôa

Choán-hêng chèng-gī choán kah piàn-hêng oai-chhoa̍h--khì

Chìn-pō͘ pau-koat chiap-siū ka-hāi-chiá ê àu-pō͘

Chū-iû ài pau-iông ka-hāi-chiá bô chōe ê chū-iû

To-goân tio̍h ài kiò lán kap in kiōng-seng

Sái-jiō lām hoeh tio̍h ài gún chia̍h--loeh, tio̍h ài gún thun-lún

Ah lán ê chèng-gī--leh?

Siáng thè lán chú-chhî chèng-gī?

Koh sī 228

Oa̍h--lo̍h-lâi ê chhin-cho̍k

Iáu ē-kham-tit kúi ê 80 tang?

Pín-chiam téng-bīn hit lúi FORMOSA LILY

Tāi-piáu ì-chì kap ǹg-bāng

Tâi-oân Bîn-cho̍k ê hóe-chéng tī chia

Lán tio̍h seⁿ-thòaⁿ, lán tio̍h thn̂g-thòaⁿ.