講３件奇怪的代誌

１．有一工佇台北的厝內，咧共衫仔收入去櫥仔內，有一領短褲，共伊囥佇邊仔，下暗轉去礁溪的時欲穿。暗時欲走的時陣，揣無彼領，只好穿別領。

過２工，轉去新店厝內，收衫的時，看著彼領短褲晾佇衫弓仔上懸，按呢我彼工佇台北厝內看著的短褲是按怎？

２．有一工，早起起床的時，共床頭的水罐佮手機仔提去桌仔頂。早頓囥入去電鍋內底炊，轉去房間揣無手機仔，房間佮客廳的桌仔頂、眠床頭攏揣無，敢講猶佇皮包仔內底？看皮包仔，有影，手機仔佇皮包仔內底，我毋知影我昨昏規暗手機仔攏無提出來，按呢我頭拄仔自床頭提去桌仔頂的手機仔是啥物？

３．有一暝，佇新店厝內，自便所出來，欲關門的時，我有特別注意，我有共喇叭鎖轉一下，以免關起來的時碰一聲，猶閣會使確定無鎖。

我欲睏的時，欲去便所，發覺鎖著矣！我想講是鎖用傷久，歹去，去用別間便所。第２工敲電話請人來換鎖，先共伊講這馬鎖著，愛先開鎖，伊講是內底鎖著。敢按呢？

伊來了後，開鎖，幾若分鐘了後，共鎖開開，伊講鎖是好的，無歹去，我入去內底鎖看覓，正常。奇怪，我明明有轉一下，是按怎鎖起來？

這３件代誌攏是我的幻影？抑是我家己想的？實際上無（短褲無佇邊仔；我無提手機仔囥佇桌仔頂；我無轉喇叭鎖，猶閣下意識共伊鎖起來，彼个鎖從來毋捌鎖過），真奇怪。