The-tāng Hùn-liān

The-tāng hùn-liān (weight training) sī chit-má chin sî-kiâⁿ, góa ka-tī mā chiok ū hèng-chhù ê ūn-tōng.

Siōng khai-sí sī tī ha̍k-seng sî-tāi ka-tī khòaⁿ chheh loān o̍h, mā bē-hiáu beh khì ha̍k-hāu ê kiān-sin-pâng, bé chi̍t tùi a-lé (dumbbell) phāiⁿ tī keng-kah-thâu tō kā khû (squat), khǹg tī thô͘-kha tō kā ngē-giâ (dead-lift), the tī nn̄g tè í-thâu-á tō khai-sí chò tn̂g-í-sak (bench-press). Án-ne bián-kóng mā bô siáⁿ-mih hāu-kó, só͘-í liān chi̍t-chām-á tō khǹg-leh seⁿ-phú ah.

Sî-tāi chìn-pō͘ ū-iáⁿ kín, chū hit-chūn kàu-taⁿ cha̍p-gōa nî, the-tāng hùn-liān tī Tâi-oân í-keng ùi ūn-tōng-oân ê choan-gia̍p hùn-liān piàn-chò chi̍t khoán tāi-chiòng liû-hêng. Bāng-lō͘-téng ū chē-chē siong-koan ê tì-sek kap chu-goân thang chham-khó, tī Youtube mā ū kúi-ā-ê lāu-su kàu-liān teh kā ta̍k-ke kà. Góa siàu-liân-sî sim-lāi hit pé jia̍t-chêng ê hóe iū-koh to̍h--khí-lâi.

Chit-má góa m̄-nā kā hit nn̄g lia̍p a-lé ūi chhng-khò͘ chhiau--chhut-lâi, koh ka-thiam chin chē khì-châi, chhiūⁿ kǹg-cheng (barbell), kǹg-phìⁿ (bumper-plate), tn̂g-í, kí-tāng kè-á...téng-téng. Liān-si̍p ê sî-kan-pió, tōng-chok, tāng-liōng, chò kúi-ê, góa mā lóng chin chiàu-khí-kang an-pâi.

Tùi tiông-sin khai-sí the-tāng hùn-liān kàu-taⁿ chha-put-to chi̍t nî kòe--khì, kám-kak sin-thé khak-si̍t ke chin kiān-khong, kha-thâu-u khah bē thiàⁿ, phah nâ-kiû kap lâng sio-lòng mā khah bē siū-siong, chit hāng ūn-tōng ê hó-chhù ū-iáⁿ chin chē!!