頭pái的台文筆會大會 作者:高嘉徽 創作日期:2020/03/07

Ē-kì-tit kū-nî ê 8 goe̍h khì chham-ka A-jîn lāu-su ê káng-chō. Góa sī hoaⁿ-hí kah tòng-bōe-tiâu, hā-khò tō hām lāu-su la-thian, kóng kúi kù-á ōe, kóng góa siuⁿ beh ka-ji̍p Tâi-bûn pit-hōe.

Tī 10--goe̍h ê sî, góa tō piàn-chiâⁿ chèng-sek ê hōe-oân ah! Si̍t-chāi ū-kàu thiòng-ê, ē-tàng ka-ji̍p tùi ū teh siá Tâi-bûn ê góa sī chi̍t chióng khún-tēng neh!

Kàu kin-nî ê 1 goe̍h-hūn, góa chham-ka Tâi-bûn pit-hōe ê hōe-oân tāi-hōe, sim-lāi ū kàu kín-tiuⁿ mā ū kî-thāi, chêng-mê khùn lóng bōe--khì, it-ti̍t teh siuⁿ chit kiāⁿ hoaⁿ-hí-tāi.

Khì chham-ka ê tông-ji̍t, góa chái-khì 8 tiám gōa tō chē hóe-chhia khì Tâi-lâm ê Sêng-kong Tâi-ha̍k ê Tâi-bûn-hē kàu-sek. Góa kàu ê sî, iáu chin chá, Chiúⁿ kàu-siū tō kiò góa tàu-sang-kang, góa tō ìn hó, tō tī kūi-tâi tàu pun mi̍h-kiāⁿ.

Beh khai-sí chìn-chêng, A-jîn lāu-su chhōa góa se̍k-sāi ta̍k-ê sian-pái, góa ta̍k-ê lóng kā chheng-ho͘ lāu-su. Án-ne tō bô m̄-tio̍h. Góa teh siuⁿ, ta̍k-ê chiân-pòe lóng-sī góa ài ha̍k-si̍p ê tùi-siōng.

Khui-hōe ê sî, thiaⁿ-tio̍h chiok chē chiân-pòe ê pò-kò kap siau-sit. Ah góa mā ū khì tâi-téng hun-hióng góa siá ê Tâi-gí si. Si-miâ sī”Sú-bêng chiân-pòe chhiáⁿ lí ûn-ûn-á kiâⁿ”, ū lāu-su kóng i thiaⁿ liáu chiok kám-tōng--ê. Án-ne góa siá liáu tō ū kè-ta̍t ah! Kàu beh tàu ê sî, Pit-hōe chhoân sú-sih hō͘ lán chia̍h, si̍t-chāi chiok chán--ê! Góa kám-kak Tâi-bûn pit-hōe sī chi̍t ê un-loán ê tōa ka-têng!

頭pái的台文筆會大會(漢羅版)

會記得舊年ê 8月去參加阿仁老師ê 講座。我是歡喜kah tòng-bōe-tiâu，下課就hām老師la-thian，講幾句仔話，講我siuⁿ beh加入台文筆會。

佇10--月ê時，我就變成正式ê會員ah！實在有夠暢--ê，會當加入對有teh寫台文ê我是一種肯定neh!

到今年ê 1月份，我參加台文筆會ê會員大會，心內有夠緊張嘛有期待，前暝睏攏bōe--去，一直teh siuⁿ chit件歡喜代。

去參加ê當日，我早起8點外就坐火車去台南ê成功大學 ê 台文系教室。我到ê時，猶真早，蔣教授就叫我tàu-sang-kang，我就應好，就佇櫃台tàu分物件。

Beh開始進前，阿仁老師chhōa我熟識逐家sian-pái，我逐家攏共稱呼老師。按呢就無毋著，我teh siuⁿ，逐ê前輩攏是我愛學習ê對象。

開會ê時，聽著chiok 濟前輩ê 報告kap消息。Ah我嘛有去台頂分享我寫ê 台語詩。詩名是「史明前輩前你勻勻仔行」，有老師講伊聽了chiok感動--ê。按呢我寫了就有價值 ah!到beh 晝ê時，筆會chhoân sú-sih予咱食，實在chiok 讚-- ê！我感覺台文筆會是一个溫暖ê大家庭!