共查某孫講台語（台文）

我的查某囝有身的時，我共伊講：「我拍算欲共囡仔全講台語，好無？佇恁３个失敗的台語，閣重新來一遍。」伊講好。我嘛問囝婿，伊講好。

２個查某囝幼稚園的時，我想著𪜶應該講台語，教𪜶講，教一遍，袂記得三禮拜，無偌久就煞煞去。

後生出世，我申請育嬰兒假，我家己𤆬，共伊攏講台語，伊會曉聽，叫伊：「提去予阿公。」伊越頭共物仔提去予阿公。

一歲半時，予奶母𤆬，央伊共囡仔講台語，伊是嘉義人，台語講誠好，毋夠伊攏講華語，伊攏總𤆬四个囡仔，攏一歲外，會曉行路。我嘛共後生改講華語。

幾若年了後，我看著一篇文章，佇講厝內底的人，固定一人共囡仔講一種語言，囡仔自然就會曉講幾若種話。彼當陣已經袂赴啊！我心內感覺足遺憾。

無想著，講無愛結婚的大查某囝結婚，閣蹛佇我遮，查某孫的出世，有機會閣來一擺。

𪜶自「做月內中心」轉來，只要嬰仔佇屋內，我攏講台語，查某囝佮囝婿應我華語，隨人講隨人的。

查某囝的朋友來厝內看嬰仔，聽著我講台語，𪜶逐个人嘛用無輾轉的台語講話，誠趣味，這是我毋捌想過的代誌（𪜶綴我講台語），我嘛誠感動。

一開始，我用手指頭仔指著嬰仔的身軀講：「鼻仔」、「喙」、「手」、「跤」……，袂曉的，去查教典，後擺才閣講。

我用的方法是：

１．用想的—幾若十年無講台語，愛想我細漢的時陣，我老母是按怎講的？抑有厝邊隔壁佮親情講的；

２．查教典；

３．看某某人的迷眾頁、台語老師的面冊、台語社團內底的貼文；

４．家己寫台文—愛寫，進步才會較緊。

５．揣講台語的機會—一開始共嬰仔講，共查某囝講；買菜的時對較濟歲的頭家講；買車票的時，用台語講；共人講話的時陣，我換台語講，有人嘛綴我講台語，有人繼續講華語，只要伊繼續講，表示伊聽有，按呢嘛會使。

佇外口講台語

需要誠濟的時間做心理準備，堅定決心，拄著面時定定改變主意，閣講華語。愛一擺一擺的練習，才愈來愈順喙。

囡仔二歲啊！本來拍算伊二歲時，去學台羅拼音，最近誠貧惰，後日才閣講，繼續寫漢字，漢字猶有足濟愛學，誠無閒。

近來去新竹參加一个討論會

這禮拜三頭一擺去，我共逐家講，我誠少有共人講話的機會，下擺開始，我欲用台語講，我是來亂的，哈！主持人講，逐家攏聽有；有一个講，伊的台語愛濫華語，我講隨在你講啥攏會使；另外一个講：「我本來就欲學台語，你認為是來亂耶！其實毋是。」哈！𪜶的反應嘛是我無想過的情形。

討論會講的，佮生活中講的，無啥仝款，大部份佇講家己的感覺、想法，下禮拜試看覓就知。

（2023.10.20.）

（請指教）

註：教典