DSE放榜有感：袁廸旗版給十九歲的我

網上圖片，電影《迷牆》，大家明咩意思～

趁DSE放榜，講吓當年我的故事，當時仲係A Level年代：

讀中四五左右，我已經打算第日大學讀電影，亦聽聞讀電影還是拍電影，文學修養好重要，於是升預科嗰陣，我做咗個大膽決定，就係選修會考冇讀過的中國文學科。

唔知係我會考成績好，定係老師好人，學校畀我選修中國文學科。不過後來的班主任同同學以為我傻撚咗，覺得我咁做太冒險，不值得。

結果當然讀唔掂，講緊係科科都讀唔掂，成績全班包尾，成日被我個死人教畜班主任照肺。當時我好大壓力，屋企電話響，總係驚係我個死人班主任打嚟，甚至諗過返學途中，被車撞倒入院算撚數，起碼唔使返學。

不過嗰時最開心嘅，都係去戲院睇戲。家住上水，成日山長水遠走去電影中心睇戲，仲要嗰陣過咗18歲冇耐，可以入戲院睇三級片！

當然呢啲事唔可以畀我個教畜班主任知道，否則好撚大鑊。我記得當年2月14係家長日(學校真識揀日子)，我好驚我班主任喺我老母面前鬧我，不過好彩都冇。

四月考試過後，我又全班包尾，小息嗰陣又被班主任捉咗去照肺。今次係咆哮嗰隻，鬧到全層都聽到，鬧我日日返學唔知做乜，冇為自己打算，亦問我知唔知我老母上星期家長日為我而哭，而我唔知。

我一直懷疑，係個教畜班主任鬧到我老母喊嘅。

班主任當我係不肖子、不負責任、沒有目標的學生。當時我同班主任講，我想讀電影。

其實我一啲都唔想同佢講，我冇提到早前浸大同APA開放日，我都有睇睇佢哋嘅電影系；我亦冇提到，台灣嘅世新、台藝電影系，甚至北京電影學院，都在我考慮當中。

班主任停下來，佢好明顯估唔到我有咁嘅回應。小息後係自修堂，我喺圖書館喊。我覺得好冇面，就嚟19歲都被人喺咁鬧……「袁廸旗版給十九歲的我」就是如此難堪。袁廸旗是本人。

後來我真係冇考A Level，去咗讀電影，之後仲去埋北京電影學院，讀嘅竟然係文學系添(呢度嘅文學其實係指編劇，別誤會)。

而家諗返起嗰陣，同班主任講嘅嘢，係對電影嘅愛的承諾。相隔多年，我仲好感慨，我好慶幸畢業後能夠從事相關工作，我愛我的工作。

講咁多嘢，只係想同各位考生講，如果你哋本身有目標、計劃同夢想的話，就去做，唔需要理會其他人嘅眼光。其他人的指導亦未必適合你，因為你嘅目標同人生，你最清楚，最掌握你未來人生嘅，都係你自己。

過程中或會不適、無助和孤獨，但回頭看，係好浪漫，係愛自己嘅表現。

共勉之。