Che sī chit ê lán khah bô teh chù-tiōng ê tāi-chì. M̄-kú, che khan-sia̍p tio̍h lán ê bîn-chú, lán tio̍h ài lâi ha̍k-si̍p. Bîn-chú sī chè-tō͘, kî-tiong giân-lūn chū-iû sī siōng chú-iàu--ê.
Tī bîn-chú siā-hōe, tāi-ke lóng ē-sái kóng ka-kī ê siūⁿ-hoat, iû-kî kong-kiōng sū-bū tāi-ke koan-sim koh-khah sī hó tāi-chì.
In-ūi siūⁿ-hoat ū cheng-chha, só͘-pái beh kap lâng ì-kiàn kau-liû tio̍h ài chù-tiōng ū ì-gī ê kau-liû kap kau-liû phín-chit. Nā sī bô kau-liû, siā-hōe beh nah ē chìn-pō͘? Tong-jiân, lâng nā kau-liû tio̍h it-tēng ē sán-seng chhiong-tu̍t, iōng siáⁿ-mih thāi-tō͘ kap beh án-chóaⁿ kau-liû lóng sī chin tiōng-iàu-- ê.Ūi-tio̍h beh î-chhî khah hó ê jîn-chè koan-hē, lán ē tiām-tiām bô beh kóng. Chún-sǹg beh kóng, mā kóng kah bô chheng bô chhó͘, bô tio̍h tèⁿ-chheng, hō͘ lán ioh bô chin-chiàⁿ ê ì-sù, sīm-chì gō͘-hōe.
Góa chin khim-phòe Tek-kok lâng hō͘-siong cheng-lūn kah khí phùi-bīn, koh oân-choân bô siong kám-chêng ê cheng-sîn. Che chiū sī bûn-hòa bô kâng ê só͘-chāi. M̄-kú, mā án-ni chin chōe lâng tio̍h chiok kian-chhî ka-kī ì-kiàn bô beh thiaⁿ pat-lâng kóng siáⁿ. In kiò che sī “Rechthaber” .Nā án-ni chòe-āu kan-na beh piān-lūn iâⁿ tio̍h sóng, bô chun-tiōng pat-lâng ê siūⁿ-hoat, tio̍h bô kiōng-sek, án-ni mā bô ha̍p-chok ê khó-lêng.
Tek-kok lâng bô khiáu, put-kò, chin gâu lūn-piān. In tha̍k-chheh lóng kà che. Góa siūⁿ, che sī su-khó ê hùn-liān, mā sī in su-sióng-ka ū miâ kap thiat-ha̍k khah kiông ê in-toaⁿ.
It poaⁿ lâi kóng, nā siūⁿ-hoat bô kâng tio̍h hō͘ lâng mā kah chhàu-thâu, su-khó tiō bōe hông kó͘-lē, án-ni tiō bōe ū su-sióng-ka.
Góa tī Tek-kok chò Tâi-oân hia̍p-hōe hōe-tiúⁿ ê sî, put-sî ē tú tio̍h Tâi-oân lâng hō͘-siong phe-phêng ē tāi-chì. Tāi-chì in-ūi lâng bōe ha̍h, tiō chòe bōe lâi. Kóng--khí-lâi, chí-sī koan-tiám kap lán bô kâng niā-niā, ē-sái piān-lūn.
Tān-sī lán bô piān-lūn bûn-hòa. Lán lóng ē in-ūi ì-kiàn cheng-chha tiō kā lâng khòaⁿ chò bô hoat-tō͘ ha̍p-chok ê lâng, sīm-chì kā lâng tòng-chò te̍k-jîn. Nā án-ni tiō te̍k-jîn jú lâi jú chōe, pêng-iú jú lâi jú chió.
Lán Tâi-oân lâng siuⁿ kòe tāng Ki-moh-chi, bô hoat-tō͘ kap bô kâng ì-kiàn ê lâng kiû kiōng-sek, tāi-chì tiō chò bōe tōa, mā bōe kú-tn̂g.
