因為文字的關係，毋知影進前台灣的代誌
最近我發現，想敨一件代誌：因為文字的改變，予台灣人毋知影進前的代誌、歷史。
▓以早的人寫的字咱看毋捌，就毋知影彼當時的代誌
日本時代，有讀冊的台灣人用日文寫文章，將in做過的代誌、看著的、頭殼內底想的種種寫落來，毋過，日本人走了後，後面的台灣人毋捌日文，就無去看遐的文章。
外國的傳教士來台灣傳教，用拼音共台灣的各種話語寫落來，嘛有出版品，若無學白話字的人就毋知影遐的字咧寫啥物。
愛等有人用華文共伊看著的日文、白話字翻譯出來，予逐家知影當時發生啥物代誌，咱才知影，毋過寫出來的干焦少少的部份爾爾，閣經過翻譯，佮直接看in寫的差真濟，造成台灣人對以早的代誌攏毋知。
閣再改做華文了後，政府嘛共台灣人教做中國人，至少對囡仔的教育是按呢做，我講中國人的教育咧我的身軀頂懸誠成功，我到35歲才知影我毋是中國人，嘛對台灣的歷史、地理攏毋知。
莫講台灣歷史上的人事物，孫仔佮阿公阿媽講的話語無仝款，對阿公阿媽彼沿的代誌就毋知影，厝內面的代誌傳袂落來，認同佮文化離離落落。
▓愛先捌字，讀in的冊，才知曉彼當陣的代誌
我的同學，歷史系畢業了後，去日本留學，伊讀煞，轉來台灣了後，我才知影伊咧研究台灣史，喔！研究台灣史愛去日本研究，因為日本統治台灣五十年，有真濟資料囥佇日本；
阮圖書館有一个主任，家己學荷蘭文，荷蘭人佇台灣彼段歷史干焦伊一个人咧研究，咱才知影當時有啥物代誌。
咱攏知影文字記錄文化，毋過愛仝款的文字才有人讀，無就囥佇圖書館的架仔頂，等待捌的人來讀。
▓愛用政府、國家的力量
像：中國的簡體字，國民政府的注音符號，攏是政府、國家來推行，才會統一、成功；秦始皇「書同文」，共文字統一定落來嘛是用政府的規定才做會到。
這馬我查教典的時，心內誠歡喜，台語按怎講，就會使直接寫落來，毋免家己激頭腦想、家己發明、亂鬥字，嘛毋驚別人看無；內容真濟，大部份攏查有。
詞典是一項偉大的物件，愛有誠濟人、誠濟技術佮經費才做會到；閣感謝有一个統一的寫法，逐家攏寫仝款的，毋免躊躇；猶未仝款、抑是有疑問的字詞，會使逐家討論，共想法佮研究著的講出來，一段時間了後，自然就有逐家攏用按呢講的寫法。這愛用政府的力量才做會到，真好運，台語行到這个地步。
▓國際化毋是英語化，愛先清楚台灣家己的特色
逐家攏咧講這馬愛「國際化」，有人想講講英語就是國際化，毋是啦！是要共每一个所在的特色提供出來，貢獻咧國際社會中，才是「國際化」。
這馬大人共台語講轉來，佮囡仔講台語，台語不只是講話爾爾，伊承載著台灣的文化、歷史、生活習慣、山川地理、蟲魚鳥獸，講台語，就會沓沓仔捌台灣的種種。
定定聽著人講，學英語較有用，學英語是嘛創啥？佮外國人講會通。將來佮外國人做伙的時陣，逐家攏咧講家己故鄉的特色，台灣人欲講啥物？毋捌台灣的人干焦會曉講中國的文化、生活，按呢人哪會知影你是台灣人？外國人欲按怎捌台灣這个國家、這个地方？這是誠大的代誌，啥物是台灣人的認同佮主體性，家己的物仔愛清楚，才會使貢獻咧國際上，才會當好好仔徛佇世界上、這个地球頂懸。
（2024.8.31.）
你可能也想看
