你係咪都試過，喺深夜時分，望住天花板，覺得自己好似一粒微塵，喺人生嘅軌道上迷失咗方向？你好努力，好想改變現狀，於是你可能聽過一個好熱門嘅動詞——「吸引力法則」。我叫他動詞，只因他確有動的能量！
到底咩係「吸引力法則」？
喺正式進入我哋嘅主題之前，不如先用少少篇幅，為可能第一次接觸呢個概念嘅朋友做個簡單科普。吸引力法則（Law of Attraction），因為朗達·拜恩嘅著作《秘密》（The Secret）而風靡全球。佢嘅核心思想係「同頻共振，同質相吸」。簡單嚟講，就係你嘅思想同情感，其實係一種能量頻率；當你持續專注喺正面嘅事物上（例如富足、健康、愛），你就會好似一塊磁鐵咁，將擁有相同頻率嘅人、事、物吸引到你嘅生命中。反之亦然。
呢個法則聽落好有力量，但好多人實踐起嚟，總係覺得有啲虛無縹緲。
但如果我話你知，呢個法則可能有一個更深層、更反直覺嘅解讀？一個唔係單純將你想要嘅嘢「吸」過嚟，而係將你「送」去你最應該去嘅地方嘅版本？
呢個全新的解讀，就係我喺小說《小麥子創富號漂流記》入面，為主角小麥子設定嘅「真實案例」。
一艘唔靠引擎，靠「遺憾」導航嘅宇宙戰艦飛船
喺我嘅故事世界入面，有一艘叫做「創富號」嘅星際飛船，其實正確來說，它更似是一艘星際戰艦。佢嘅使命，唔係去殖民，唔係去戰鬥，而係去執行一項特殊任務：為宇宙中唔同嘅生命，彌補遺憾，搵返一個圓滿嘅結局。駕駛佢嘅，係一位叫做小麥子嘅 零號「遺憾解決師」。
但最特別嘅係，呢艘船嘅航行方式。
佢唔係傳統科幻電影中嗰種，設定好A點到B點嘅座標，然後引擎全開、進行曲速飛行嘅戰艦。經歷過一次嚴重墜毀之後，創富號嘅動力系統受到永久性損壞，經過主角小麥子的系統核心改良，引擎嘅能量，還足夠佢喺星球表面進行「起飛」同「降落」。
咁中間漫長嘅星際航程點算？
答案係……漂流！無錯，你無聽錯，係漂流，漂出去。
就好似一塊木筏喺大海上隨波逐流，創富號喺宇宙中，大部分時間都處於無動力嘅漂流狀態。但呢種漂流，並唔係隨機，更加唔係漫無目的。佢被宇宙中一種更深層、更原始嘅力量牽引住——嗰啲係來自唔同星體、唔同生命所發出嘅「遺憾信號波」。
當一個生命體嘅悔恨、悲傷、或者對圓滿嘅渴求去到極致，佢嘅靈魂就會發出一種獨特嘅頻率。呢種頻率就好似宇宙級嘅「SOS」，喺時空嘅維度上產生星願漣漪，而創富號嘅船體，就係一個巨大嘅接收器。佢會被呢種「靈魂引力」捕捉，然後好似被黑洞吸引一樣，慢慢、慢慢咁漂向嗰個信號嘅源頭。
呢個，就係創富號嘅「吸引力法則」——佢唔係吸引財富嚟到自己身邊，而係被宇宙中「財富」（圓滿結局）嘅所在地吸引過去。 佢嘅GPS，唔係星圖，而係宇宙中嘅眼淚同嘆息。
迷路，原來是為了去到對的地方
聽到呢度，你可能會諗：咁樣咪好被動？完全冇得控制自己嘅航程，咪即係「迷路」？
無錯。但係，我哋人生中總有迷路嘅時候，唔係咩？當你嘅計劃被打亂，當你嘅目標變得模糊，我哋會好驚，會覺得自己失敗咗。
但迷路，係咪真係一件壞事？
呢個問題，令我諗起一個畢生難忘嘅黃昏。當時我喺長沙一個度假營，眼見日落時分，就獨自去到嗰個幾乎冇人嘅沙灘游水。當我慢慢行入水深及腰嘅地方，然後，我做咗一個決定：放棄所有掙扎，將身體完全交畀大海。
我輕輕向後一躺，好神奇，身體好自然咁浮咗上水面。耳邊嘅世界瞬間變得好安靜，只係聽到自己平穩嘅呼吸，同埋海水輕輕拍打嘅聲音。我面向住橙紅色嘅天空，睇住太陽溫柔咁沉入水平線，將餘暉灑滿我全身，嗰種感覺，係無拘無束、係徹底嘅自在。
喺嗰段唔知幾耐嘅時間入面，我任意被海浪溫柔咁漂浮、推送。我冇諗住要去邊，亦都唔擔心會「漂」去邊，因為我知道附近環境好安全。嗰一刻，我體驗到真正嘅「漂流」。
漂流唔係迷失，而係一個「淨空」嘅過程。佢係一個心靈上嘅洗禮。喺嗰個狀態下，你好似冇方向，但內心反而變得無比清澈，更加睇得清自己真正嘅方向。你好似冇目標，但靈魂深處最渴望嘅目標，反而會悄然浮現。
呢種體驗，比起喺室內打坐冥想，更加立體、更加真實。因為你唔係「想像」自己同大自然連結，而係用你嘅皮膚感受陽光，用你嘅舌尖感受鹹味，用你嘅耳朵聆聽海風同鳥叫，你真正「成為」咗大自然嘅一部分。
呢種「漂流」，就係我喺創富號故事入面，想表達嘅核心哲學：佢係一個機會，畀你停低嗰個追趕目標追到疲憊不堪嘅自己，畀一個空間你去同內心對話，去重新感受身邊嘅世界。
創富號嘅「漂流」，就係呢種哲學嘅極致體現。小麥子唔需要焦慮咁去搵下一個任務目標，佢要學識嘅，係「信任」。信任呢艘船，信任宇宙嘅安排，相信呢種看似無為嘅漂流，最終會帶佢去到最應該去嘅地方，遇見最需要被拯救嘅靈魂。
咁，我哋點樣啟動自己嘅「人生漂流模式」？
創富號嘅故事，其實係一個比喻。我哋每個人，都係自己人生號嘅艦長。如果你都想啟動自己嘅「吸引力法則」，唔係去強求啲咩，而係去到「對」嘅地方，或者可以試下以下嘅心法：
- 關掉過載的引擎： 暫停一下永無止境嘅計劃同追逐。唔係叫你放棄努力，而係停止嗰種源於焦慮同恐懼嘅「盲目衝刺」。
- 校準你的內心接收器： 安靜落嚟，感受自己嘅情緒，聆聽內心嘅聲音。同時，亦都去感受身邊人嘅需要，留意生活中有冇一啲「信號」不斷出現？可能係一個朋友嘅求助，一個新嘅興趣，一個偶然睇到嘅故事……正如你此刻正在閱讀這篇文章，或許，這就是宇宙想讓你看到的故事，一個溫柔的提醒，一個來自遠方的信號。
- 相信漂流的智慧： 當你跟隨直覺，做出一啲「唔喺計劃內」嘅選擇時，請相信呢個過程。**就算暫時睇唔到終點，甚至唔知道起點喺邊，**都要相信呢段「漂流」，係帶緊你去一個更適合你、或者更需要你嘅地方。
麥田健二世界中的吸引力法則，可能唔係將你想要嘅嘢「吸」過嚟，而係將你「送」去最需要你嘅地方。當你由一個「索取者」變成一個「給予者」，成為一個「遺憾解決師」，你會發現，全宇宙真係會為你開路。
呢個關於宇宙航行嘅「真實案例」，就喺我嘅小說《小麥子創富號漂流記》入面，一場又一場咁上演。
你的漂流故事，我想聽
我哋每個人嘅人生，都係一場獨一無二嘅漂流記。喺呢趟旅程中，或者你都曾經迷航，曾經喺迷霧中掙扎，但最終又喺意想不到嘅地方，搵到同自己和解嘅力量。
如果你都有一個關於「迷路」與「尋回」嘅故事想分享；如果你都想學習點樣喺「漂流」中，搵到屬於自己嘅定力；又或者，你只係需要一個樹窿，去安放你無處可訴嘅心情……
我好樂意成為你嘅聆聽者。
你可以將你嘅故事「漂」到來我的信箱 [kkinseed@gmail.com]。
唔需要完美嘅文筆，只需要一份真誠。
喺呢個《深情滋味信箱》入面，所有嘅情感都會被溫柔接住。
期待喺文字中，與你嘅靈魂相遇。
