台語佇20年了後就會死亡，不管你欲信抑無，你佮我隴見證會著。台語憲章這本書是賴一心先生最近出版的。伊講，台語的死亡線佇20年後，這不是the諢耍笑的。因為一个語言若三代人攏無咧講，就會使宣佈死亡。
咱看咱身軀邊的人，阿公對家己的孫攏講中文，越頭佮伊的牽手阿媽講台語。 為著 欲 予 孫輩佇 學校無 語言障礙， 阿公阿媽煞綴孫講「國語」， 爸母mā 佮 囡仔講 中文。 這款代誌逐个感覺真四常， 毋過， 逐个 斟酌想看莫， 20年後阿公阿媽無佇ê阿，厝裡就無人講 台語 ，台語無人 teh 講， 敢若 聽唱歌佮 看歌仔戲、布袋戲聽會著。 少年--ê， 英語對幼稚園就學， 加減 閣會曉講。台語 佮其他母語，20 歲以下少年--ê， 絕對連聽就聽無，擱khah免期待怹會曉講。
現在擱有70趴會曉聽台語的人，攏自動無欲佮厝裡的人講阿，其他母語就擱khah 悽慘。 台灣人 過去 予 人殖民 無話講， 日本時代 國語是日語， 咱著ài講 日語。 中國人 來， 國語是 中國北京話， 咱 就予人 逼去學中國話，家己母語喙舌 鉸斷學 別人歷史文化。 咱的人予人 教講 台語無 文字， 看輕家己， 失去 民族自尊， 感覺家己臭賤， 講 台語無水準mā 無路用， 真正悲哀。
台灣這馬是 咱 ê 人 做 總統， 台語 佮其他母語攏算 國家 語言， 受 國家語言法保障。 不過， 國家語言法聽起來真好， 但是， 這ê 法 敢若 壁紙， 對 母語無 實際ê 保障嘛對歧視講母語ê人，無處罰。到今王義川立委佇國會講台語，著擱予張亞中要求講「國語」。請問國家語言法是teh 擺媠ê hio͘h？ 是按怎 咱 到 chín 佇 國會閣 無 母語翻譯， 這敢毋是違反 國家 語言發展法第四條「國家語言一律平等，國民使用國家語言應不受歧視或限制」以及違反第七條第三項「強化公共服務資源及營造友善使用環境。」
照按怎講起來，是主管機關(文化部)失職? 立法院已經出過幾落擺這款代誌，咱台灣是欲到當時才會當創造母語友善環境？
這本書提醒咱，母語欲活， 咱 著 ài 講， ài 創造 咱 有會使 聽著台語的環境佮全面受台語教育ê權利。現在政府常提錢鼓勵逐家學外文，英文、日本、法文，但就是無鼓勵咱學家己的母語文字？
賴一心作者引用威爾斯詩人kap 文學教授Gwyn Wiliams 的話講：威爾斯人作一個民族，怹對出生就予人剝奪掉怹的繼承權。The Welsh , as a people , were born disinherited。講起來,這和台灣的現狀相仝。咱20年後的台灣囝仔,怹的命運就像威爾斯人仝款。
中華民國政府，近來感覺做中國人的祖國嘛真歡喜，叫台灣人提中國旗， 講 這 就是 台灣。 予別人殖民久阿， 就袂記得家己應該 值咧過有尊嚴ê 生活， 敢若 台灣人天生 生來就予人 蹧躂ê。 台灣 是 台灣人ê 台灣， 是 按怎20年後會 變做 無台語、 無 客語、 無 原住民語 ê 台灣？ 現在咱佇厝裡講台語抑是其他母語的囡仔，出去欲和啥人講？
自按呢20年後無台灣母語 ê 台灣， 敢閣是 咱台灣ê台灣？一個予咱祖先講欲超過500年以上的語言，徹底死佇咱一代的喙內，咱敢對會起台灣？ 咱敢抑有面死後見祖先?
台灣 欲 做 中華民國的奴才，中國的祖國，kap對岸中國番袂煞 ; 抑是欲共中國切掉，做家己台灣的主人，這就看咱這一代台灣人欲打拼無？這三年是關鍵的幾年，三年無做盡磅，母語就死亡。
