目睭看著的，無一定佮你想的仝款（台文）

●年紀差不多

幾若年前，我佇社區大學上課。有一个同學，伊讀高中的查某囝交男朋友，伊有真濟話欲共人講，揣同學一个一个講。伊講一箍輾仔了後，來到我的面前，共我自頭看到腳，手比阮２个，講：「咱年歲差不多，想法仝款。」

我隨應伊講：「我的想法佮你無仝款。」伊無閣講話，越頭去揣別人，我的耳空安靜囉！

●輕鬆仔寫就好

我退休的時，共寫好20萬字的小說提去自費出版，送同事、朋友看覓，華語講：「跌破大家的眼鏡。」有夠好耍。

有一擺拄著一個同事，講著寫小說，伊共我講：「已經退休矣！輕鬆仔寫，袂予家己有傷濟的壓力。」是喔？我是誠認真看我寫小說這項代誌，毋是寫耍的。因為我是查某人，閣退休，就毋免認真做一項代誌喔？

有一个同事，伊的翁是軍人，退休的時，40外歲，伊借蹛朋友無人蹛的厝寫小說，拜六遮轉去in兜。in有３个囡仔，囡仔散學了後，攏轉去外媽兜，同事下班了後，去伊的媽媽兜食暗頓，食完𤆬囡仔轉去家己的厝。這項代誌逐家攏知。

哪會差遐濟？仝款退休，佇寫小說，查埔人家己蹛，專心寫，厝內面佮囡仔的代誌攏免做，我要煮飯、摒掃、𤆬囡仔，閣有人共我講，毋免遐認真，輕鬆仔寫就好。

輕鬆仔寫哪會有成就出來？看著查某人，就鬥著：「毋免有成就」這句話矣！唉！

●「按呢就好矣！」

我阿兄考大學彼年，放榜了後，阮老爸in兜有代誌，就規家伙仔轉去。有一个親情的阿姆問我的媽媽阿兄考牢佗位？我媽媽頭犂犂，用真沒自信，足歹勢，閣誠細聲的聲音講：「台大數學系。」

彼个阿姆隨大聲應：「按呢就好矣！按呢就好矣！」我佇邊仔看著，心內感覺足好笑，是你家己愛用遐無自信閣歹勢的表情，加細細聲仔講，阿姆想講是考甲若歹咧！應這句來安慰。無讀書的庄跤阿姆哪會知大學的排名？

●「你的國語講甲咧咧叫。」

囡仔細漢的時陣，有一陣請人摒掃。彼个歐巴桑自板橋騎跤踏車來台北市共人摒掃，誠拍拚。有一擺，伊共我講：「你的國語講甲咧咧叫。」奇怪，我佇上班，無講華語，欲講啥物語？干焦我的年歲佮你仝款，就愛佮你仝款，華語無溜？

●送媽媽塗跤攄仔做禮物

阮少年的時陣，看著百貨公司有人佇示範新型的塗跤攄仔，想著攄塗跤是媽媽的「工課」（？？），真辛苦，有人會買，送予媽媽做母親節的禮物。毋知做媽媽的人收著這个禮物是欲笑，抑是想欲哭？

落尾看著有人寫佇報紙上來教逐家：送予媽媽的禮物應該是共媽媽講：「媽媽，今年我送予你的母親節禮物是，我負責攄塗跤。因為我較袂曉做，所以買一支新型的攄仔來用。」這才是真正的禮物。

●「來佮我做同學。」

我考大學的時，宿舍區內有一家是我老爸的上司，已經退休矣！伊的後生比我加一歲，已經佇讀大學。有一擺，是我共伊借書，抑是伊共我借書，我去in兜，伊聽著我佇準備考大學，講：「考牢淡江，來佮我做同學。」我心內想，是按怎我愛考牢淡江呢？因為厝邊的關係，都愛佮你仝款？誠奇怪。