阮tau chū 細漢就是chi̍t-ê 拜拜 ê 家庭，só͘-tì 我mā 順其自然tòe 爸母pài，m̄-koh in chiok 有環保 ê 意識，就是會燒香bōe燒金錢。雖罔我tòe teh 拜，m̄-koh tī 我tha̍k 中學 ê 時，心內出現一種聲音，就是lán só͘ 拜 ê 神敢真正會保庇我？因為我tha̍k 中學ê 時，hō͘ 同學霸凌，嚴重影響tio̍h我 ê 心靈，hit-sî 我無hoat-tō͘ 接受án-ne ê 家己kap 環境，m̄-koh我真幸運tī 大學1年 ê 時熟似教會ê姊妹phōaⁿ。In 透過耶穌ê話來kā 我講神愛世人，較su nā-sī 罪人主mā kâng-khoán 會接受kap 疼痛阮。阮大學內底有福音 ê 社團，iā 就是兄弟姊妹會招chiok-chē 福音朋友kap 教友來參加。
Tng-tong 我接受án-ne ê 福音 ê 時，我真hí-lo̍k！因為主就是tī lán ê 心中，只要tha̍k 主 ê 話，tī 靈--lih 祈禱，伊就會看顧阮！Lán long-sī 普通人，只要簡單 ê 祈禱ia̍h-sī 唱詩歌，唱--leh唱--leh唱kah流目屎，che 苦 ê mā 變做甜 ê 滋味！Lán 只要呼求主耶穌伊 ê 名，伊就會保守lán ê sim。我真感謝tī 大學時期拄著 chit ūi 寶貝 ê 救主，hō͘ 我 ê 人生親像重新oa̍h 過來。有動力koh kè-sio̍k kiâⁿ--落去，hō͘ 我面對身體ê病痛，lán m̄-kiaⁿ，就勇敢khì 面對！主 ê 保守lán，向望 tī 未來，主會kè-sio̍k kah 我同在！
*Khan tī 教會公報社NO.3654(2022/03/7-03/13)
*Beh看華文版tī chia: https://vocus.cc/@google4058/614d2aa3fd897800018ecb86
