請聽我講

　　我所惜个朋友，識同我相吵還過和解个人哪，請你等聽。我愛講話。將我盡尾个意思傳達分你等。

　　我從來毋識想過，佇我个人生裡肚，我會恁樣規生人無討無降。一儕人，行著這片。行到恁遠。單淨有你這等个朋友。我乜無想著，我會生到恁久，久到我屋下人全無在了。降我畜我，我有記憶个時就共下个同伴，全在我以前離開了。單淨有你這等朋友。

　　我這生人無麼个成就，無出名，也毋識好好享受，快樂過。這世間，我無麼个東西做得留下來。單淨有你等。你等識記得我，過後再有一日，你等正會毋記得我。我个朋友，係我將你等留分這个世間。

　　我無降你等，乜毋識飼你等，將你等畜大。我仰會講，「我將你等留分這世間」？因為每一日都係無共樣个日仔；逐日，我等都會堵著無共樣个人。佇我等个生命，無論你所堵著該隻人係仰般微細，在你个生命裡肚係仰般無重要；甚至，佢係你个冤仇人。佢已經在我等个生命裡背了。你無試著个時，佢等已經改變你。分你變著較好，還係較壞。

　　故所你等堵著我，係較好嘛？總係我知，佇你等裡背已經有我个影跡。係你等生命个一部分。故所你等毋好灰心，因為你等个生命裡背有別人。逐日，你等都會體驗著該日係新个。

　　總係我个生命嗄愛停止了。你等還佇个行有光个路，我嗄愛橫落去，等我个身體漸漸完全無感覺。你等無需要安慰我，因為我，乜無法度安慰我自家。盡尾係感謝了！承蒙你等來陪我，這个無利益个人。這个黏時就會化做塵灰个人。我所惜个朋友，請陪我到最終。